Chanmari FC-in Shillong an pan

MPL champion Chanmari FC chuan Indian Football League khel turin nimin khan train hmangin Aizawl an chhuahsan a, Mizo club hian November 6, Zirtawpni zan dar 6:30 hian Shillong Lajong nen an inhmachhawn dawn.

Pathianni zan IFL inkhelah Sreenidi Deccan-in Rajasthan United 1-0 in an hneh. Sreenidi tan Jerry Mawihmingthanga leh Lalromawia ten bul an ṭan a, Bench aṭangin Lalthankhuma leh Brandon VL Remdika te an lut. Hyderabad club-ah hian Lalbiakdika leh Rochharzela te an awm bawk.

Rajasthan-in season liam taa Chanmari FC midfielder Chritopher Kamei an nei a, Mizo tlangval pahnih Lalfelkima leh Ricky H. Vanlalhriatsanga ten bul an ṭan a ni.

Inkhel dangah Dempo-in injury time-a Ghanaian defender Budu goal hmangin 1-0 in Bengaluru United an hneh. Bengaluru United-ah Lalramdinsanga Ralte-in bul a ṭan a, bench-ah Jakob Vanlalhlimpuia leh Jojo Zaihmingthanga te an awm bawk.