F1 champion naupang ber Antonelli

Pathianni zan Mexican Grand Prix-ah Mercedes driver Andrea Kimi Antonelli chuan, hnehna chang zo loin pathumna ni mah se point 15 a hlawh chhuak a, tun season champion niin Formula 1 champion thei naupang ber a ni bawk.

Autódromo Hermanos Rodríguez-a intlansiakah Ferrari driver te an che ṭha a, Lewis Hamilton leh Charles Leclerc ten hma an inhruai chhawk zak zak. Lap 49-na aṭangin Max Verstappen-a'n hma a hruai ṭan.

Italian driver Antonelli erawh ṭum dang angin langsar lo mah se a tlan chhe lo a, champion turin point li chauh a mamawh avangin hnehna chan kher tumin a tlan lo tih a lang.

Red Bull driver Verstappen chu a tawpah hnehna changtu a ni a, Hamilton chu pahnihna niin, second li hnuah Antonelli chu pathumnaah a thleng ve bawk a, champion nan a tawk.

Finish line' a thlen dawnin Antonelli chu mipui mit fukna ber a ni a, Silver Arrows (Mercedes sawina) driver hian a tawp a khar hnuah a mittui a dang zo lo a, a car a tihdin hmain a ṭap hial.

Antonelli chuam, "Season duhawm tak ka hmang a, Verstappen leh Hamilton te nena podium kan lawn thei hi a ropui ka ti. Hetiang dinhmun hi ka team vanga thleng ka ni a, anni leh ka chhungkua puihna tel loin ka thleng thei dawn lo. Tunah chuan intlansiak hmabak hi nuam ti takin ka tlan thei tawh ang," a ti.

Kum 20 mi Antonelli hian Sebastian Vettel-a record khumin champion thei naupang ber a ni ta a, German driver Vettel hian 2010 khan Abu Dhabi Grand Prix-ah kum 23 mi niin a lo champion tawh.

Hei bakah hian Antonelli hi 1953-a Alberto Ascari hnua Italian driver champion leh hmasa ber a ni a, Italy chuan an ram mi F1 champion nei leh turin kum 73 zet an nghak a, a tawpah Antonelli an nghak chhuak.

Tun season-ah Antonelli a che ṭha a, point 380 hmu tawhin vawi kua hnehna a chang tawh a, vawi 16 podium a lawm tawh bawkin amah hnaih bertu Verstappen aiin 219 aiin a sang zawk a, champion a phu takzet.

Mercedes driver pakhat zawk George Russell pawh a che chhe lo a, driver's table-ah hun rei tak pahnihna hauh mah se season laihawlah chetsual a ching a, tun hnaiah a inthlahdah bawk avangin palinaah a tla a, Verstappen 1eh Hamilton-a'n a lehpel.

Chutihrualin kum 28 mi Russell hian vawi thum hnehna a chang tawh a, podium vawi riat lawn tawh bawkin constructors table-a Mercedes-in hma an hruai theih nan a thawh hlawk hle.