Kan rilru put hmang a dik lo - Barella

Serie A Champion Inter Milan midfielder Nicolo Barella chuan an rilru put hmang a dik loh bakah, player ṭha an kawl tam tawk loh avangin tun hnaiah an result-in a tuar tih a sawi.

Inter hi Inrinni zan khan Milan derby-ah 3-1 in an chak lo a, Milan derby hnuhnung paliah a tlawm zawkah an ṭang vek. AC Milan an hneh loh ṭumin Barella hi a khelh ṭhat tawk loh avangin sawisel a hlawh a, a ṭawng chhuak ve ta.

Kum 29 mi Barella chuan, "Kumin kum tir aṭang khan kan rilru put hmang a dik lo a, chak duh tak takna kan nei lo, chu chu thil ṭha lo tak a ni. Tun hnaiah Milan derby kan khel chhe thei em em a, chak tura rin hlawh zawk nih ringawt hi a tawk lo.

Chu bakah substitute bench aṭanga game thlak danglam thei khawpa player thiamna nei an awm lo a, chu chuan manager thutlukna siam kawngah nghawng a nei lian takzet," a ti.

Tun season-ah Inter hi league-ah an che chhe lo a, Serie A-ah Milan chiah hi an hneh loh awmchhun an la ni a, mahse Lazio chuan an hmahruaina ata an pawt thla tawh thung.

Champions League-ah erawh beisei an pha lo a, match thum khel tawhin vawi khat chiah an la chak a, table-ah 20-naah an awm. An defender Alessandro Bastoni pawhin an khelh dan thlirin final thlen an la hlat thu a sawi.

An coach Cristian Chivu pawhin Milan derby-ah pawh hnehna chan an harsat a nih chuan UCL-ah an thleng san dawn lo tih a lo sawi tawh bawk a, a hma aia an ṭan lehzual a ngaih thu chanchinbu mite a hrilh.

Inter hian zanin dar 1:30 hian Champions League-ah Feyenoord an lenchilh dawn a, an chak loh avanga boruak nung tawk lo siam ṭhat nan Dutch club an hneh a ṭul ang.