Real Madrid an insiamṭha zel

Spanish club lian Real Madrid chu insiamṭha zelin Pathianni zan khan Racing Santander chu an mualah 3-0 in an luhchhuah a, Jose Mourinho naute tan Kylian Mbappe, Jude Bellingham leh Yan Diomande ten goal khat ṭheuh an khung.

Campos de Sport de El Sardinero-a inkhelah Mbappe-a'n ama penalty hlawh chhuah chu minute 11-na lekah a khung nghal a, French forward tan tun season la Liga-a a goal 11-na niin, Raphinha chiah a tluk lo.

Real an phur laklawh a, minute 22-naah Arda Guler-a pass ṭha zet chu Bellingham-a'n um lutin keeper a bum tlang hnuah goal ruakah a khung a, an hmahruaina a belhchhah. Turkish midfielder Guler-a'n chance neih chhunzawm mah se a khung ve thei lo.

Mual neitu team insiamṭhat ve hmain Real-in goal an khung leh a, minute 35-naah Diomande chuan corner aṭanga ball kal zel chu kawh zetin a khung a, Racing keeper Julen Agirrezabala tan dan ngaihna a awm lo.

Second half-ah Bellingham-a'n a goal hnihna khung mah se, English forward hi a offside avangin pawm a ni lo. Racing-in chance an insiam ve thei lo a, hun tawp thlenga goal dang a luh tawh loh avangin Real an chak.

Los Blancos hian Atletico Madrid an hneh loh hnuah an insiamṭha a, match ruk khel leh tawhin an chak vek. Jose Mourinho naute hian Thawhlehni zan Champions League-ah AEK Athens an hmachhawn leh nghal dawn a, Greece panin an zin chhuak leh nghal ang.