Team 32 chiah an dam ta

MBOCWWB MFA Inter Village Futsal Tournament third round chu vawiin aṭangin R. Dengṭhuama Indoor Stadium-ah khelh ṭan a ni dawn. Inelnaah hian team 71 an tel a, team 32 chiah an dam tawh.

Inter Village Futsal hi BR Studio YouTube aṭangin a en theih a, inkhel en châkawm bik a awm nual. Chawhma dar 11:00-ah inkhel hi ṭan a ni dawn a, tlai dar 1:30-a Ramhlun Venglai leh Aizawl Venglai inkhel tur hi en châkawm zinga mi a ni ang.

Chutihrualin Durtlang leh Chanmari inkhel tur hi a la hmuhnawm zawk thei a, football leh futsal thiam veng pahnih hi an fitness a ṭhat tel avangin chak tur pawh rin thiam a har hle. Tlai dar 4:00-ah Dinthar leh Zemabawk North an inkhel dawn a, MPL13 final khel thei club awmna Dinthar hi an chhiat ring suh.