Palace tan City an thiam mah mah

Premier League champion tura rinkai Manchester City chuan an mikhual Crystal Palace 4-0 in an sawp. Pep Guardiola naute hian point 35 hmuin pahnihna dinhmun an chelh, an khelh hmabakah an chak a nih chuan Manchester United chungah an awm dawn.

Pathianni zan Etihad Stadium a inkhelah City tan defender John Stones-a'n goal hnih a tauh lut a, midfielder Ilkay Gundogan-a'n goal mawi a khung bakah forward Raheem Sterling chuan an chak a nemnghet.

Man City hian Thawhlehni zanah Aston Villa an mikhual zui leh dawn, point thum an hmu a nih chuan khelh zat inangah United an tlanpel dawn - league nomawi inchuh boruak a sang chho dawn hle.

Hrileng kaihhnawih vangin Sergio Aguero inlan thei lo mah se ball chang hnem City tan buaina tur a awm lo, a tir aṭanga a tawp thlengin inkhel an thunun a, a khat mawi tawkin goal an khung reng bawk.

Kevin de Bruyne-a'n a ball pet thiam zia 'show' nana a cross chu defender Stones-a'n a tauh lut. Belgium international midfielder hian 2015 a City a zawm hnuah a club tan inelna hrang hrangah assist vawi 100 a nei tling der.

Second half tir lamah Gundogan chuan box pawna a ball sual chhuah chu rang taka siam remin goal kilah a khung, a duhna takah a duh ang thlapin a pet a ni ber; league match a khelh hnuhnung paruk aṭanga a goal lina a ni.

Pep-a nauten an la duhtawk lo, tun hma lama City tana league goal la khung ngai lo Stones bawkin hnai tak aṭangin a hlap lut a, hun tawp hma deuhin tun hnaia goal khung tam lo Sterling chuan freekick aṭangin a chhuih lut.

January 18, Thawhṭanni (nimin) khan Guardiola-a'n kum 50 a tling a, atana ni pawimawh tak hi rilru lungmuang leh hlim takin a lawm thei tihna a ni. League bakah, Champions League, FA Cup leh League Cup-ah an la champion thei vek bawk.

Duhthusamin season bul ṭan lo mah se Stones leh Ruben Dias an inkawp hnuah an tlarhnung a phui. Defender pahnih hian inelna hrang hrangah vawi 10 bul an ṭan dun tawh a, goal khat chauh an chhuah. Aymeric Laporte awm loh karah pawh buaina an nei lo tihna a ni.

Guardiola chuan, "Tlarhnung remphui chungchangah mimala fak tur an awm a nih chuan Stones a ni ang. Ani hian hun harsa tak a hmachhawn fo a, harsatna hneha a rawn thawh chhuah dan hi a ropui hle - Ruben Dias nen an inkawp rem hi a lawmawm," a ti.

City hian tlarhnung laiah Laporte an chhawr rim ṭhin, mahse French defender hi season hmasa khan hliam vangin a buai a, team pawhin an tuar hle. Kuminah pawh a hliam leh, mahse a awm loh karah Jones a khel ṭha a, defender thar Ruben Dias nen an rintlak.

* Manchester City hi tun season Premier League bikah a zawna vawi nga chak thei hmasa ber an ni.

* City hian tun season league bikah clean sheets vawi kua an nei tawh - match hmasa 17 china chhutin an record ṭhat ber ṭum an tawng.

* Kevin de Bruyne-a'n City tan inelna hrang hrangah assist vawi 100 a nei ta a, Etihad Stadium apan aṭanga chhutin amah hnaih bertu aiin vawi 32 zetin a nei hnem zawk.

* De Bruyne hian tun hnai season nga chhung chu league-ah assist vawi 10 chuang a nei ziah.