India tan Valpuia'n SAFF khel dawn

South Asian Football Federation Championship-ah Hmingthanmawia Ralte (Valpuia) chu India tan a inlan dawn a, Mumbai City fullback hi SAFF-a Blue Tigers coach tur Naushad Moosa-a'n a koh zingah a tel.

Durtlang tlangval Valpuia hi Mumbai City tan fullback rinrawl a ni a, India tan vawi kua a lo inlan tawh. November 18, 2024 khan India tana a match hmasa ber khelin Malaysia a hmachhawn a, 1-1 in an inhnehtawk.

Valpuia hi September international break-a India-in Panama, Brazil leh Uruguay an hmachhawn ṭum pawh khan squad-ah a tel a, SAFF Championship-a inlan turin koh a ni leh ta.

Hetihrual hian SAFF hi November 5, Ningani aṭanga khelh ṭan tur niin, international break-a khelh a ni lo a, hei vang hian Khalid Jamil-a'n kaihruai loin, Moosa-a'n a kaihruai a, senior player eng emaw zat koh an ni lo.

November international break-ah India hian New Zealand chu friendly match khelhpuiin, khualmualah an hmachhawn dawn a, hei vang hian India hian SAFF leh New Zealand tour khel tur squad pahnih an neih a ṭul phah - Khalid-a'n international break atana squad a hranpain a puang ve leh ang.

SAFF-ah hian India bakah inelna thlengtu Bangladesh, Bhutan, Maldives, Sri Lanka leh Pakistan te an tel a, group pahnihah, team pathum ve ve awma ṭhen hran niin, group pahniha a sang pahnihten semifinal an khel ang.

India hi Maldives leh Pakistan te nen group khatah an awm a, Ningani tlai dar 3:00-ah Pakistan nen match hmasa ber an khel nghal dawn - vawi kua an champion tawh a, champion ngun ber record an chelh mek.

SAFF squad-ah hian Valpuia tih loh Mizo player dang awm an awm lo a, coach Moosa hi FIFA Under-15 World Cup-a India coach Bibiano Fernandes chuan Assistant Coach niin a pui dawn a ni.