First Division final-ah Bawngkawn FC vs Chawnpui FC

Life Care Pharmacy ADFA First Division-ah Bawngkawn FC leh Chawnpui FC te vawiin chawhnu dar 1:00 hian Durtlang Football Stadium-ah an inkhel dawn. Season liam ta khan First Division-ah Ramthar Veng an champion a, MPL-ah inpet tling zuiin MPL khelh zawh takah semifinal an lut pha hial.

Vawiina final khelh tur pawh hi MPL tana kal kawng pawimawh a ni a, First Division champion hian MPL qualifier an khel thei dawn. Aizawl DFA-in quota pahnih an nei a, MPL khel turin league winner Ramhlun North an tling tawh bawk.

Bawngkawn FC hi tun season-a din thar leh an ni a, ISL player hlui Ricky Lallawmawma chu player leh coach angin an la lut a, an ṭhatpui hle. Ricky hian khelmual chhungah hmun pawimawh a chang pha a, player ang pawhin a thawh hlawk. Chutihrualin semifinal-a league winner Ramhlun North an hneh theih nan Robena'n goal awmchhun a khung.

Chawnpui FC hi MPL9 champion an ni a, MPL11 khan an relegate. ADFA hnuai First Division inelnaah team ṭha zinga mi an ni a, an veng tlangval Ephraim Vanlalduhsaka hoin champion an inbeisei ngam ang. Inkhel hi BR Studio-ah a en theih ang.

First Division-ah hian best player thlan a ni dawn a, a dawng thei tur player paruk an tar chhuak tawh. Best player nominee-te chu chu Ricky Lallawmawma (Bawngkawn FC), Robena (Bawngkawn FC), Ephraim Vanlalduhsaka (Chawnpui FC), Fredy Lalrinchhana (Tuithiang FC), Dantes K. Lalhriatpuia (Tuithiang FC) leh Royal Moses (Ramhlun North FC) te an ni a, vawiinah chawimawina dawng tur tihchian a ni ang.