Inter Village Futsal-ah team ṭha tla dawn

MBOCWWB MFA Inter Village Futsal Tournament third round chu nimin khan khelh ṭan a ni a, vawiin hian R. Dengṭhuama Indoor Stadium-ah khelh chhunzawm a ni dawn.

Nimin lam inkhel hmuhnawmah Chanmariin Durtlang an pet tla a, Aizawl Venglai pawhin Ramhlun Venglai lakah 3-0 in hnehna an chang. ITI Vengin Zotlang 11-0 zetin an sawp a, Saikhamakawnin Vaivakawn 4-3 a hnehin last 16 an lut hmasa ber.

Vawiin inkhel turah team ṭha inhmachhawn tur an awm nual avangin team 32 awmna third round chauh ni mah se team ṭha tal tur an awm nual. Inter Village Futsal hi BR Studio YouTube aṭangin a en theih ang.

Tlai dar 5:15-a Zonuam leh Tlangnuam inkhel tur hi en châkawm a ni a, a tu zawk pawh tla se, team ṭha bik an tla a tih theih ang. Hemi hma chiah hian Republic Veng leh Electric Veng te an inkhel dawn a, futsal-ah chuan Electric Veng hming a lian zawk.

Sihphir leh Armed Veng te pawh inkhel tawk viau turah a ngaih theih a, team ṭha ber zinga mi Sihphir Venghlun pawh an inlan dawn. R. Dengṭhuama Stadium-ah futsal inkhel hmuhnawm en tur a awm ang.