Barry goal hmangin Everton an chak

Thawhṭanni zan Premier League inkhelah Everton chuan 1-0 in Newcastle United an hneh a, goal awmchhun hi Thierno Barry khung niin khualmuala a team chakpui nan a tawk.

St. James Park-a inkhelah team pahnihte an inhlauh tawn avangin goal hlauhawm a awm tlem a, Harrison Armstrong-a'n a hun ṭha neih a chhawr ṭangkai theih loh chu first half-a chance awmchhun a ni.

Mahse, second half-ah Everton an insiamṭha nghal a, ṭan aṭanga minute lina lekah goal an khung nghal. Tyrique George-a shot chu Magpies keeper Lukáš Horníček-a'n a dang ṭha tawk lo a, Barry-a'n hnai tak aṭangin a khung.

Kum 24 mi forward tan tun season inelna hrang hranga a goal riatna chiah a ni a, season hmasa khan hetiang zat khung tur hian match 41 zet a mamawh. Tun season-ah erawh match 12 chiah a mamawh thung.

Goal an khung hnuah Toffees an phur a, Jarrad Branthwaite, Kiernan Dewsbury-Hall leh Jake O'Brien ten chance an neih chhunzawm. Mahse, goal hmaah an hriam tawk loh avangin an hmahruaina an belhchhah thei lo.

Magpies tan Anthony Elanga-a'n chance a neih chu goal line a pelh hmain James Tarkowski-a'n a pet chhuak hman a, minute 90-naah Yoane Wissa shot chu Jordan Pickford-a'n a dansak bawk.

Wissa hian pet loin Jacob Ramsey emaw Jacob Murphy pe zawk se an result a danglam hial ang. Injury time-ah Ramsey hnawhchhuah a ni zui a, thawh chhuah ngaihna a awm tawh loh avangin an mualah Magpies an tlawm.

Everton coach David Moyes chuan. "Ka naute an khel ṭha ka ti a, mahse he result hlawhchhuah hi a awlsam lo hle, chuvangin fak an phu takzet," a ti.

Moyes chuan Jack Grealish chungchanga zawhna chhangin, "Tun dinhmunah chuan chhawr theih a la ni lo a, club hotute nen kan inbiak hnuah engkim a chiang ang," a ti.

English forward Grealish hi tun hnaiah a nungchang ṭhat loh vangin Toffees tan a inlan lo a, a fitness a ṭha tawk lo bawk. A nungchang chungchanga zawhna an zawh erawh Moyes hian a chhang duh lo thung.