Real Madrid-in AEK Athens tlawh dawn

Spanish club lian Real Madrid chuan zanin dar 11:15 hian Greece club AEK Athens an lenchilh dawn a, tun season Champions League-a la chak vek leh vawi khat chiah la chak an inhmachhawn dawn.

Tun season-ah Real hian tluk leh din an fawm a, mahse an match hnuhnung parukah hnehna an chang vek. Heng zingah hian El Clasico-a Barcelona an hneh chu a langsar zual a ni a, Jose Mourinho naute phur vanglai tak a ni.

La Liga lama an hrem Vinicius Junior chu chhawr theih a ni dawn a, Vini Jr. awm loh chhungin Yan Diomande a khelh ṭhat avangin Real-in harsatna an tawk lo a, Brazilian forward a awm phei chuan an hlauhawm lehzual ang.

Hei bakah hian hliam vanga chawl Federico Valverde-a'n training a zawm leh tawh a, mahse, squad-ah a awm a nih pawhin bul a ṭan kher a rinawm loh. Rodrygo leh Raul Asencio te erawh an la chawl zel dawn thung.

Goal thum khung tawhtu Kylian Mbappe chu khawih chet thiang lo tluk a ni a, amah thlawptu Arda Guler-a hmuhnawm thei hle. Season thara a lansarh tawk loh vanga sawi hlawh Jude Bellingham a khel ṭha leh tawh bawk.

Mi tam zawkin chak turin Real an dah ngal a, club pahnihte inthlauh dan enin thil mak a ni lo. Mahse Europe khawmualpui inelnaah Los Blancos-in away match-a Greece club an hmachhawn hnuhnung pariatah vawi khat chiah an chak a, hei hi AEK innghahna pakhat a ni dawn.

AEK tan Joao Mario chu damlohna avangin a inlan thei dawn lo a, Real laka Portuguese midfielder tawnhriat ngah awm lo tur hi chânna nasa tak a tling.

Chutihrualin Real tan pawha lo khel tawh Luka Jovic an nei a, Serbian striker hi Spanish club hrechiangtu niin, inelna hrang hranga goal kua khung tawhtu Barnabás Varga nen an inkawp dawn avangin, Super League Greece champion lai hi zuam chi an ni lo ang.