Suns laka Warriors chakpuitu Curry

NBA Regular season khelh mekah nimin zing khan Golden State Warriors chuan 116-113 in Phoenix Suns an hneh a, Warriors chakna Stephen Curry chuan point 34 score-in, ani aia point hlawh chhuak hnem an awm lo.

Chase Center, San Francisco-a inkhelah Suns-in bul an ṭan ṭha zawk a, Devin Booker hoin Jordan Goodwin, Oso Ighodaro leh Jalen Green te che ṭha nghalin, first quarter-ah point 31 an score.

Warriors erawhin first quarter-ah point 19 chauh an nei thei a, Charles Bassey-a'n an basket tang rei lutuk tur a kaltir thei hlauh zawk. Suns lakah a vanduai zawkah an ṭang leh dawnin a lang hman.

Second quarter-ah pawh Suns bawk chu point nei hmasa zawk an ni a, Booker, Miles Bridges leh Luke Kennard ten three points an lut a, Warriors-in a chhanletna an nei lawk lo.

Mahse, Warriors tan an thiampuipa Curry-a'n a thiam thil a lantir a, three points bakah a ṭhiante tan hmun awl siamsakin, assist a nei chho ṭan. American point guard bakah Bassey, Brandin Podziemski leh Yaxel Lendeborg ten hma an sawn avangin 57-51 in chawlhlawk an hmang.

Third quarter-ah Warriors-in bul an ṭan ṭha zawk a, player te kut a kal tawh avangin an game a dik lehzual. Mahse, Suns-in Khaman Maluach an luhtir a, 7 ft 1in-a sang Khaman hi Warriors tan a hnawk nghal hle.

Minute hnih chauh third quarter-ah an khel hman tihin an dang hleithei lo a, Sudanese center hi amah vengtu ber Draymond Green chuan a nam tluin, Khaman chhantu Dillon Brooks nen an intibuai zui. Green hi 'double technical' pek niin hnawhchhuah a ni a, Brooks erawh 'technical foul' chauh pek a ni thung.

Kum 38 mi Green khelh chhunzawm theih loh avangin Warriors defence nghing mah se an kut kal lai a reh phah lo a, Curry chu dan hleihtheih loh khawpa khel ṭhain Bassey, Podziemski leh Lendeborg te an inthlahdah duh tawh lo - point 17-a hnufual hman kha third quarter a thlen meuh chuan 93-93 in Suns an nihrual tawh.

Fourth quarter-ah boruak a ṭang zual a, team pahnihten hma an inhruai chhawk zak zak. Boruak sangah Booker a fimkhur tawk lo a, ball a hloh hnem bakah ṭul lo taka foul a neih avangin minute khat pawh awm tling tawh loah vawi nga a foul tlin avangin a 'foul out'.

Warriors-in 'free throw' an hmuh an hlah duh lo a, an hmahruaina an tipung zel. An player ṭha ber an chân hnuah Suns-in foul bak tih theih an nei tawh lo a, Curry-a'n a hlah duh bik lo avangin point thumin a vanduai zawkah an ṭang.

Tun season-ah Warriors hi an match hmasa pathumah an chak lo nghal a, beisei an pha dawn loa lan hnuah Curry a inlar a, Kum 38 mi Curry hoin an insiamṭha leh tawh.