Mizo telna India U17 leh UAE inhnehtawk

AFC Under-17 Asian Cup 2027 Qualifiers khel tura inbuatsaih mek, Mizo pali awmna India Under-17 chuan qualifier khelh hmaa an friendly match -ah UAE hmachhawnin, 0-0 in an inhnehtawk.

India U17 leh UAE hi zanin dar 8:30-ah friendly match an khel leh dawn a, Saud Bin Saqr Al Qasimi Stadium, UAE-ah an inkhel ang - India hian hemi zawhah hian qualifier khelhna tur hmun Kuala Lumpur, Malaysia an pan leh dawn a ni.

Mehrajuddin Wadoo kaihhruai India U17 hian AFC U17 qualifier-ah hian Malaysia, Palestine, Singapore leh Guam te chu group E-ah an awmpui a, group-a hmahruaitu chauh chu Asian Cup U17 khel tura tling tur an ni dawn.

November 11, Nilainiah India hian an match hmasa ber chu Singapore nen an khel ang a, Guam, Palestine leh Malaysia an hmachhawn zui leh dawn - Asian Cup hi May 12-29, 2027-ah Uzbekistan-ah khelh tur a ni a, a zawna Asian Cup U17 khelh tumin India an inbuatsaih mek.

India hian UAE hma hian Myanmar chu friendly match an lo khelhpui tawh bawk a, vawi hnih inhmachhawnin, match hmasa zawkah 1-1 in inhnehtawk mah se, match hnihnaah erawh 4-0 in India an chak thung.

AFC U17 Asian Cup qualifiers khel tur India squad-ah hian Mizo pali awmin, defender Lawmsangzuala, Malsawmtluanga leh Zoramdinthara bakah midfielder R. Lawmsangzuala te an tel.