Haaland-a pa a hlauthawng

Manchester City-in tun hnaiah result an nei ṭha lo a, an league match hnuhnung pahnihah an tlawm ve ve - team-in boruak duhawm lo a neih laiin striker chhuanvawr Erling Haaland-a pa Alfe-Inge a ṭawng chhuak a, tun hnaia City thubuai chu chinfel vat a nih a beisei thu a sawi chhuak.

City player hlui Alfe-Inge chuan, "Engpawh ni se, thubuai kan khinletna min chhan dan hi kan ngaihchan phawt a ngai a ni ber mai. He club tlu lai hmuh duh a, châng reng kan elpui club, fans leh journalist tam tak an awm a, rang taka thubuai hi chinfel a nih ka beisei.

"Tuna kan tih theih awmchhun chu dawhthei taka nghah a, kan thubuai khinletna min chhan dan lo thlir hi a ni deuh ta mai," a ti. Alfe-Inge chuan sawi zawmin, "City lam hian thiam an chan theih an inbeisei tlat a, keini tih theih chu a result lo nghah hi a ni," a ti.

City hi thubuai 115 siamsak an ni a, 114-ah thiam loh an chang - heti zat thubuai an khinletah hian thiam channa tawk nei pawh ni se, talbuai zuina tur thil chu a awm tho dawn niin a lang.

Hetiang boruak karah hian City player langsar tam tak chu chhuak tur anga sawi thawm a awm reng a, Haaland-a hming a ri ring zual - Norwegian striker hian tun season-ah match 11 aṭangin goal 13 a khung leh der tawh a, Real Madrid-in an thlithlai reng nia sawi a ni.

Haaland-a pa Alfe-Inge chuan, "Erling hi chuan thil dang vak a ngaihtuah rih lo a, a tam thei ang ber inkhelh hi a duh chu a ni mai - chu lamah chuan a rilru a dah ber," a ti a, "Khelmual pawn lama mite hian kan lo sawi nasa mai mai a ni," a ti zui.

City hian zanin dar 1:30-ah Champions League match khel turin RB Leipzig an lenchilh dawn a, match thum khelh tawhah vawi khat an tlawm tawh - Paris St-Germain (4-2) lakah an tlawm a, Premier League-a an match hnuhnung pahnihah Aston Villa (1-2) leh Brighton & Hove Albion (0-1) an ngam lo bawk a, Enzo Maresca-a'n team boruak chhe tur siam ṭha turin chak a mamawh.