Pawm thiam a har - Russell

Mercedes driver George Russell chuan tun season-a chet dan chu pawm thiam har a ti a, a tan kum ṭha a nih loh thu sawiin a ṭha thei ang bera kir leh a tum thu a sawi. Russell hian a teammate Andrea Kimi Antonelli chu a lawmpui thu instagram-ah a post bawk.

Kum 28 mi Russell chuan, "Tun hi ka rilrua thil awm sawi chhuahna hun dik tak niin ka hria. Tun season-ah ka beisei leh tum dan ang ngeiin bul ka ṭan ṭha a, mahse thil a inthlak danglam rang hle.

Ka career-a chet ṭhat ṭum aia chet chhiat ṭum a tam zawkna hmasa ber a ni hial ang. Ka result hi pawm thiam harsa ka ti a, a laklawha insiamṭhat a harsa ka ti takzet bawk. Kum 2026 hi ka tan kum ṭha a ni lo tih hi ka pawm a ngai a ni," tiin a post.

British driver hian tun season-a intlansiak hmasa ber Australian Grand Prix-ah khan hnehna a chang a, mahse hemi hnu hian a chetsual ngun bakah a teammate Antonelli a inthlahdah ve loh avangin hun rei tak driver's table-ah pahnihnaah a awm.

Tun dinhmunah phei chuan Russell hian point 250 hmuin palinaah a tla tawh a, Max Verstappen leh Lewis Hamilton te pawhin an lehpel tawh. Antonelli a champion laiin pahnihna dinhmun beisei bak tih theih a nei tawh lo.

Chutihrualin Russell hian a teammate Antonelli a lawmpui a, champion nomawi chu a phu ber tih a sawi bawk. Silver Arrows (Mercedes sawina) driver pahnihte hi track chhungah inel mah se, intlansiakna pawn lamah chuan inhuatna an nei lo tih a lang chiang hle.