Lewy-a'n record thar a siam

Bayern Munich striker Robert Lewandowski chuan Bundesliga record thar a siam zanah a club a chakpui a, an mikhual SC Freiburg 2-1 a hnehin table-ah point liin an sang fal ta.

Poland international hian minute sarihna lekah goal a khung a, season kal laia a goal khungna a ni. Bundesliga match hmasa 16 aṭanga hetiang zat goal khung thei hi an la awm ngai lo, mellung hlu tak a phun.

Lewandowski-a'n season tir lam khan match hmasa panga aṭanga goal 10 khung thei record a lo siam tawh bawk, tunah chuan kum 49 liamtaa Gerd Muller-a'n goal 40 a khung record kha a el leh hmasak tur a ni ang.

Hansi Flick-a naute hian tun hnaiah beisei an phak lo a, league match an khelh hnuhnunga an chak loh bakah German Cup aṭangin an tla bawk. Hun harsa an tawh laiin Lewy a inlar a, ani bakah hian Thomas Muller chuan goal a khung bawk.

Bayern manager Flick chuan, "Hnehna chang turin kan khel ṭha tawk viau a, a bik takin tlarhnung lamah hmasawnna hmuh tur a awm avangin a lawmawm. Rilru zawng zawnga chak tuma kan khelh hi chuan a boruak a danglam ṭhin," a ti.

German champion Bayern hian Nilaini zanah Augsburg an lenchilh chhunzawm leh nghal ang.