Spanish Super Cup Messi OUT; Barca OUT; Bilbao = champion

Spanish Super Cup final-ah Barcelona an tawlhthlu a, kum 2015-a an lo mualpho tawhna Athletic Bilbao bawk ngam loin 3-2 in an tlawm. 

Barcelona chhuanvawr Lionel Messi chu minute 120-naah hnawhchhuah a ni a, Barca jersey ha chunga Argentine forward-in red card a hmuh hmasak ber a ni. 

Catalan club tan Antoine Griezmann chuan vawi hnih ngawt hmahruaina goal a khung a, Athletic hian Oscar de Marcos leh Asier Villalibre hmangin an sut. 

Extra time khelh zui a ni a, Inaki Williams chuan minute 93-naah Bilbao tan a khung - goal dang a luh tawh loh avangin Athletic Bilbao hi 3-2 in an chak a, an champion. 

Seville khelmuala inkhelah chak tura beisei zawk Barcelona-in goal an khung hmasa zawk a, French forward Griezmann chuan Messi shot dan per aṭanga ball kal chu minute 40-naah goal hmahruai ni turin a khung. 

Mahse, Barca hlim chhung a rei lo - an goal khung vanga an hlim authawm pawh a reh fel hmain De Marcos chuan Williams-a ball cross aṭanga ball kal chu si phurh sut nan a hmang. 

Barcelona-in 1-1 a inhnehtawk chungin chawlhlawk an hmang a, Ronald Koeman hnen aṭanga thu ṭha an ngaihthlak hnuah Griezmann chuan a pu leh Barca fan-te hmela nui hmel hnutchhiah turin an goal hnihna a khung. 

Catalan club hian nomawi an chawi tawh mai dawn niin a lang hman - mahse, minute 90-na a kal mek laiin substitute Villalibre chuan a puin a luhtir chhan pholangin si phurh a rawn sut a, 2-2 a ni ta daih!

Barca fan-ten champion lawm dan an ngaihtuah hnuah extra time an en a ṭul leh ta zawk a, Bilbao lamin goal an khung hmasa zawk zui!

Bilbao player chhuanvawr Inaki Williams chuan European club liante chil a tih put chhan pholangin goal mawi bik a rawn khung a, Barca an hawihai.

Minute 90-naa si phurh suttu team khan extra time-ah hma an hruai ta zawk a, Barca-in hun tawp thlengin si phurh sut tum mah se goal an hlawh chhuak zo tawh lo. 

Barcelona hian Spanish Super Cup final lut tur hian Real Sociedad chu penalty hmangin an lo hneh hram tawh a, Bilbao lakah vawi hnih ngawt hma an hruai chungin a tlawm zawkah an ṭang leh ta bawk - Koeman-a'n Barca coach a nih hnua nomawi chawi turin a nghah hret a la ngai. 

Tun season-a team talbuai tak Barca-in 2021-ah harh tharna an chang chho a, nipuia contract hmang zo tur Lionel Messi-a intuai thar bawk - Bilbao hma hian a match hnuhnung parukah goal ruk a khung. 

Mahse, January 6 zana Barca-in 3-2 a league match-a Athletic Bilbao an hneh ṭuma goal hnih khungtu Messi-a'n goal a zawng hmu zo lo a, a duh loh red card a zawng hmu ta zawk!

Argentine forward hian Asier Villalibre chuan hun tawp dawn tawhah mawi lo takin a kuai thlu a, referee-in hmu lo mah se video assistant referee-in a hmuh avangin ennawn a ni - hnawhchhuah loh chi a ni lo. 

Messi hian tun hmain red card vawi hnih chiah a hmu a, Argentina kawr ha ve vein a ni thung. Kum 2005 khan ram tana a match hmasa berah Hungary hmachhawnin red card a hmu a, Copa America 2019 third-place playoff-a Chile nen an inhmachhawn ṭumin hnawhchhuah a ni tawh bawk. 

Athletic Bilbao boss Marcelino chu fak phu a ni. January 4 khan Bilbao enkawl hna hi a ṭan ve chauh a, match thum lek a kaihruai hman tihin nomawi a chawipui der!

Valencia-a enkawl laia rin loh taka Copa del Rey (2018-19) nomawi lo chawi tawhtu hian a match hmasa berah Barca a hmachhawn nghal a, 3-2 in an tlawm. 

Spanish coach hna a awlsam lo - a match hnihnaah Spanish Super Cup semifinal khelin Real Madrid a hmachhawn a, rin hlawh zawk Madrid khaw club hi 2-1 in an pet chhuak. 

Final-ah an league match hnuhnung bera an ngam loh Barca an tawng zui a, rin hlawh lo zawk nichungin nomawi an chawi leh ta - La Liga (2017-18) a Best Coach lo ni tawh hi a hming kan la hre dawn chauh.