Khalid Jamil a chak nghal

Aizawl FC coach hlui Khalid Jamil-a'n NorthEast United coach lailawk hna chu a match hmasa berah zo takin a chelh nghal a, Jamshedpur FC chu 2-1 in an hneh. 

Pathianni zan ISL inkhel dangah FC Goa leh ATK Mohun Bagan chu 1-1 in an inhnehtawk bawk a, ISL boruak a ngaihnawm zel. 

Aizawl FC boss hlui Khalid Jamil hian June, 2019 khan NorthEast United hi head of academy leh assistant coach ni turin kum thum chhung atan a zawm. 

Kuminah pawh assistant coach hna chelhin Goa pan zingah a tel a, mahse, mahni thu duh ve tak coach hi hetihlaia Highlander coach Gerard Nus nen an inhmu thiam lo nghal. 

Duhthlan turah NorthEast thuneitute an chiang a, Khalid chuan a hna ngai 'head of academy' hna chelh turin Goa a chhuahsan thu an puang - a nihna takah chuan hetihlai hian Covid-19 vangin academy kalpui hleitheih a ni lo. 

Highlander thuneitute hian club chhungkaw buaina thup an tum a, mahse, Khalid hi Nus nen an inhmuhthiam loh vanga Goa chhuahsan a ni tih chiang takin a lang. 

Highlander-in bul ṭan ṭha viau mah se an zuih avangin Nus an ban a, assistant coach tih tur nei lo Khalid-a lam an hawi - Mumbai tlangval hian lawm takin a hna thar a pawm a, a team a chakpui nghal. 

NorthEast United tan hian Khalid-a chher len Ashutosh Mehta chuan goal hmahruai a khung a, kum 28 mi right back hi Khalid-a'n Mumbai FC-a enkawl laia professional contract-a ziahpui a ni a, Aizawl FC-ah pawh khan Khalid hi a zui. 

NorthEast tan striker Deshorn Brown chuan a club thar tana a match hmasa berah goal-a khung nghal bawk a, ani hi hliam vanga season tluan inlan thei lo tur Kwesi Appiah hmun ruak luah tura Bengaluru aṭanga an lakluh a ni. 

Jamshedpur tan Peter Hartley chuan goal khat a khung ve a, awmzia erawh a nei lo. JFC tan hian Ricky Lallawmawma chuan bul a ṭan a, Isaac Vanmalsawma leh William Lalnunfela chu minute 46-naah luhtir an ni - NorthEast lamah Lalengmawia chuan bul a ṭan ve bawk. 

ISL table chung lam inkhelah ATK Mohun Bagan-in Edu Garcia freekick mawi zet hmangin goal hmahruai khung mah se FC Goa-in Ishan Pandita hmangin an chhanglet a, 1-1 in an inhnehtawk. 

Bagan tan Subhasish Bose leh Manvir Singh-te chuan bar an tih per a, Goa tana Seriton Fernandes-a ball cross chuan Bagan defender Sandesh Jhingan perin bar a per bawk!