Paris Saint-Germain-in goal an surtir

European champion Paris Saint-Germain-in goal an khung chhunzawm zel - Thawhlehni zan khan an mikhualna ramah Villarreal chu 6-0 ngawtin an sawp a, Luis Enrique naute hi UCL match li an khelh tawhah an la chak vek!

PSG hian inkhel ṭantir minute 17 chhungin goal li an khung hman a, Villarreal fan-ten an club tihmualphoa a awm lai thlirtu nih chu duh loin, minute 20 a tlin chuan fans ṭhenkhat chuan stadium an chhuahsan tawh!

Spanish club tlarhnung an pherh a, European football-a tlarhma nei ṭha ber pawlin hrem lohin an chhuah lo chiang hle. Minute kuana lekah Joao Neves chuan corner aṭanga ball kal chu goal hmahruai ni turin a khung.

Minute thum a liam a, Villarreal keeper Peter Gulacsi a chesual zui - a ball pass sual chu Desire Doue chuan an goal hnihna turin a khung a, Spanish club an insiamṭhat phah chuang lo. Minute khat hnu lawkah Senny Mayulu chuan Villarreal tlarhnung pherh vang thoin a khung belh a, 3-0 a ni der.

PSG hian an la duhtawk lo cheu! Minute 17-naah Fabian Ruiz a hun a inher chhuak a, Spanish midfielder hian French club goal lina a khung - Villarreal fan-ten beisei tur an nei lo tih an hre hma a, khelmual an chhuahsan ṭan der.

Second half pawh mikhual team ta tho a ni a, Ruiz bawk kan hmu. Spain international hian mawi zeta amah vengtu a lam khum hnuah, PSG goal lina chu minute 50-naah a khung a, 5-0 a ni.

Minute 78-naah kum 17 mi David Boly chuan PSG goal rukna a khung ve leh a, French club tana a goal hmasa ber a ni nghal. PSG an chak a, Champions League-a a zawna champion thei team lakah dawl zawrin Villarreal an zawr a ni ber e.