Getafe mikhual tur hliam ngah Brighton

Zanin Conference League-ah Getafe leh Brighton & Hove Albion te dar 1:30-ah an inhmachhawn dawn a, player inhliam ngah mah se Premier League club hi an buai lo a, an tan Spanish club hi fiahna a ni ang.

Tun season-ah beisei phâk bakin Brighton an che ṭha a, Premier League-ah pathumna ni mekin an tluk loh awmchhun hi Arsenal leh Manchester City an ni. Pathianni zan khan 1-0 in City an hneh a, an boruak ṭhat lai a ni.

Mahse hliam an ngah a, Stefanos Tzimas, Kaoru Mitoma, Femi Azeez, Zadok Yohanna leh Evan Ferguson te an la dam thei lo. Hei bakah hian Pascal Struijk leh Ferdi Kadioglu te dinhmun a chiang lo bawk.

Chutihrualin an coach Fabian Hurzeler-a'n a player neihte a hmang thiam a, zaninah veteran midfielder Pascal Gross hoin hnehna chan leh ngei an tum dawn a, tlarhma lamah Georginio Rutter a pawimawh bawk ang.

Getafe erawh bul an ṭan ṭha lo a, La Liga-ah vawi thum chiah la chakin Conference League-ah an la chak lo bawk. Mahse zaninah an muala khel tur an ni a, hnehna chan ngei an inbeisei dawn.

Goal thum khung tawh Martín Satriano leh a kawppui Enes Unal te chu an hmachhuan a ni leh dawn a, tlarhnung lamah Real Madrid defender hlui Dani Carvajal a awm dawn bawk avangin zuam sual theih an ni.