Khualmualah Inter an chak

Serie A champion Inter Milan chuan Thawhlehni zan khan an mikhualna ramah Feyenoord chu 3-0 in an hneh a, Lautaro Martinez awm lo mah se goal khung kawngah harsatna an tawk lo.

Inter tan Yann Aurel Bisseck-a'n minute riatna lekah an hmahruaina goal a khung a, an hawi kir tawh lo. Pio Esposito-a'n minute 34-naah an hmahruaina a belhchhah ve leh a, 2-0 in chawlhlawk an hmang.

Second half-ah mual neitu insiamṭha hretin ball chang hnem mah se chance an insiam hleithei lo a, Inter tlarhnung an ding khawng ṭha bawk. Minute 54-naah Piotr Zielinski-a'n an chak nemnghehna goal khungin Inter-in hnehna chang turin harsatna an tawk lo.

Cristian Chivu naute hi Inrinni zan khan Milan derby-ah chak lo mah se an tlu rei lo. Mahse, November 8, Pathianni zan hian Cesc Fabregas-a enkawl Como an hmachhawn leh nghal dawn a, an tan fiahna hautak a ni ang.

Como nen an intawn hunah Martinez a lo kir leh thei tawh dawn nia sawi a awm a, Argentine forward a inlan thei a nih chuan an tlarhma a hriam leh sawt ang. John Stones, Luis Henrique leh Benjamin Pavard te pawhin dam lam pan mah se Como lakah an inlan theih a la rinawm loh.