Thunder-in Westbrook jersey retire dawn

Oklahoma City Thunder chuan an player hlui, Russell Westbrook a jersey hak ṭhin no. 0 chu midang hak theih tawh loh turin an retire dawn niin thuchhuah an siam.

NBA point guard lar ber zinga mi Westbrook hian kumin August khan inkhelh a chawlhsan a, a chawlh thu a puan aṭanga thla thumnaah a club hlui Thunder chuan chawimawina an neih tur thu hi an puang ve nghal.

Thunder Chairman Clayton I. Bennett chuan, "Westbrook jersey kan retire thei tur hi kan inchhuang zawk a, he team tana hun rei tak chhung hna ṭha tak a lo thawh tawh avanga kan tih theih tawk a ni. Oklahoma mipuite pawhin an ngaina a, helai hmunah hian a hming a dai tawh lo ang," a ti.

OKC chuan nakkum February 8, Thawhṭanni zinga New York Knicks nen an inkhelh hunah Westbrook-a jersey hi retire turin ruahmanna an siam a, anmahni stadium Paycom Center-ah ngei midang hak theih tawh loh turin an khai kâng dawn.

Kum 37 mi Westbrook hi 2008 NBA draft-ah khan OKC chuan an club-a khel turin an thlang a, hetihlai hian OKC hi Seattle SuperSonics hming an put lai a ni. Thunder-ah kum 11 zet khelin 2012 khan final a luhpui mah se, Miami Heat an hneh lo.

Kum 2019 khan Thunder chhuahsanin Rockets-ah a kal a, hemi hnu hian ngai a awh leh tawh lo niin mi tam takin an ngai. Season khat hnuah Rockets chhuahsan leh nghalin Washington Wizards a zawm a, Wizards tan pawh hian season khat chauh a khel.

Los Angeles Lakers-ah 2021 khan lutin LeBron, Anthony Davis, Carmelo Anthony, Dwight Howard, Rajon Rondo leh Isaiah Thomas te nen an khel ho mah se a champion pui thei chuang lo.

Lakers tan 2023 thleng khelin hemi hnu hian LA Clippers bakah, Denver Nuggets leh Sacramento Kings tan season khat ṭheuh a khel a, Kings hi a club hnuhnung ber niin championship title chawi loin inkhelh a chawlhsan.

Westbrook hi NBA champion thei lo mah se a ṭhatna sawi bo theih a ni lo a, 2017 khan Most Valuable Player (MVP)-ah thlan a ni a, hemi kum vek hian scoring champion a ni a, 2015 khan a lo ni tawh bawk. Hei bakah hian vawi thum assist leader a ni thei.

All Star-ah vawi kua thlan ni bawkin All Star Game-ah MVP vawi hnih a ni bawk. A career pumpuiah match 1301 khel hmanin, triple doubles vawi 209 zet a siam a, NBA-a triple double siam hnem ber a ni mek.