Scotland squad-ah McTominay a kir

Napoli midfielder Scott McTominay chu Nations League lo awm tur atan koh a ni leh ta a, Scotland coach thar Sebastien Pocognoli hnuaia a vawi khat inlanna tur a ni ang.

Kum 29 mi McTominay hi September khan a lung phut dan a dik tawk lo tih hmuhchhuah a ni a, zai nghal niin thla khat dawn chawlin International Break-ah an ram tan a inlan ve lo.

Tunah erawh Scottish midfielder hian ngai a awh leh tawh a, zai a nih hnu hian match sarih aṭangin goal li a khung tling leh der tawh. Belgian coach hnuaiah hmun pawimawh a chan nghal a rinawm.

McTominay bakah hian Kieran Tierney leh Che Adams te chu koh an ni leh bawk a, Tottenham Hotspur defender Andy Robertson chuan match khat a khel leh a nih chuan Sir Kenny Dalglish-a record (102) a nihrual thei tawh dawn bawk.

Tartan Army (Scotland sawina) hian November 13, Zirtawpni zanah North Macedonia an hmachhawn dawn a, ni hnih hnu lawkah Switzerland nen an inkhel leh nghal dawn.

Pocognoli naute hi group E-ah awmin match li aṭangin point li chiah an la hlawh chhuak a, Manchester United midfielder hlui McTominay hoin result ṭha an beisei ang.