Man City chhanhimtu Haaland

Erling Haaland chuan goal khung a bansan thei lo a, Manchester City striker hian Nilaini zan Champions League-ah chakna goal khungin, a team chu RB Leipzig lakah 3-2 in hnehna a chanpui.

Norwegian striker bakah hian Enzo Fernandez chuan goal khat a khung a, Leipzig defender Castello Lukeba-a 'own goal' bawk. Leipzig tan Ridle Baku leh Antonio Nusa te goal khungtu chu inkhel tihmuhnawmtu mai a ni.

Mualneitu team tan Lukeba chuan City hmahruaina goal a 'khilai' a, French defender hi a fimkhur tawk loh avangin goal khat a hnufual chungin halftime an hman a ngaih phah.

Second half-ah erawh Leipzig-in goal an khung hmasa a, Baku chuan Gianluigi Donnarumma venah a awl lai tak hmu fuhin an si phurh sutna goal a khung. Mahse, minute kaw hnu lawkah Enzo-a'n tauh lut leh nghalin a team hma a hruai nawnpui.

Chutihrualin city hlim chhung a rei bik lo a, minute thum a liam chauh tihin Nusa chuan an si phurh a sut ve leh nghal a, Norwegian forward hian tawih zetin goal kilah a pet lut.

German club-in Enzo Maresca naute an dang tluan thei dawnin a lang hman a, mahse Haaland-a'n City tan minute 78-naah chakna goal a khung a, Leipzig-in a chhanletna tur an neih tawh loh avangin khualmualah Cityzens an chak.

Kum 26 mi Haaland hian UCL-ah goal 61 a khung tling ta chiah a, Real Madrid striker hlui Raul Gonzalez-a record (71) nihrual turin goal 10 bak a mamawh tawh lo.