Arsenal-in Slavia Prague an hneh

Premier League champion Arsenal-in an hmaa ding chu an hneh zel - Liverpool an hneh hnuah Slavia Prague chu Champions League lamah an hneh zui a, Nilaini zan khan khualmualah 2-1 in hnehna an chang.

Gunners tan Noni Madueke leh Viktor Gyökeres ten goal khat ve ve an khung a, Slavia Prague-in Wiktor Nowak hmangin goal khat khung ve mah se, awmzia a nei phak lo - Gunners lakah an tlawm a, Arsenal an kal zel.

Arsenal boss Mikel Arteta-a'n Liverpool laka bul ṭan player paruk ngawt a thlak danglam a, match khelh tur an ngah avangin Premier League club lianten tun season zet chu starting XI an siksawi ngun hle.

London club-in khualmualah mikhual tlangnel zia chhuahin, goal pawh an khung hma. Minute kuana lekah Gyokeres chuan Noni Madueke tan siamsakin, English forward hian inringtawk takin, goal hmahruai a khung a, 1-0 a ni.

Arsenal-in an duhtawk mai lo. Minute 38-naah Madueke khung tur siamsaktu Gyokeres hun a her chhuak a, Swede striker hian Gunners tan bul ṭan a phu tih pholangin an goal hnihna a khung.

Season hmasa Champions League finalist-in Prague khawpuiah an theihna sanzia an pholang a, "Goal engzat tak khung belh ang maw?" tih chu zawhna a ni hman.

Mahse, beisei loh takin second half-ah Arsenal an tlahniam a, David Raya-a'n hna a nei nghal - Oskar Kubiak chance neih ṭha zet chu Gunners keeper hian a dansak a, Mojmir Chytil-a tauh goal ngei tur nia lang chu Gabriel Magalhaes chuan goal line aṭangin a lo 'clear' bawk.

Minute 90-naah Slavia Prague hian Wiktor Nowak hmangin goal an khung ve ta nge nge a, mahse, Czech champion goal khung a tlai hret tawh - Arsenal lakah an 'comeback' thei ta lo.

Premier League champion-in UCL match li an khelhah tlawm an la nei lo a, vawi thum hnehna changin, Bayern Munich an draw tawh bawk. Slavia Prague lakah an chak a, coach Mikel Arteta erawh a lawm a kim lo.

Spanish manager chuan, "He team theihna ka thlirin, kan khel ṭha tawk lo. Second half-ah khan inkhelh laia thil thleng lo tura kan duh ang chu kan thlentir deuh vek a, he team aṭanga ka beisei ang ka hmu lo a ni.

"Mahse, kan ṭang tluan thei a, a tawpah chuan hnehna kan chang," a ti - an khelh danah Arteta lawm lo mah se, beisei an phak lohna inkhelah pawh point thum an hlawhchhuah theih avangin an result-ah erawh a lawm ang.