Chanmariin Lajong lakah phuba la thei ang em?

Indian Football League-ah zanin dar 6:30 hian NorthEast Derby en tur a awm dawn a, SSA football stadium, Shillong-ah Chanmari FC leh Shillong Lajong te an inkhel dawn. Season liam ta khan Lajong-in Mizo club ṭum hnih ngawt an hneh; Aizawlah Chanmari FC 2-1 in an hneh a, Shillong-ah Aizawl FC 6-1 in an sawp. MPL champion hian Mizo club tan phuba lak an tum ang.

Chanmari FC hian Mizoram Premier League avangin IFL atan inbuatsaihna an nei ṭha tawk lo a, chutihrualin Nagaland United-in Mizo hlangin match hmasa berah inkhel thunun chunga Real Kashmir an hneh avangin Chanmarians pawhin ngaih ngam takin inelna an hmachhawn thei ang.

IFL-ah Mizo club hian Brazilian pahnih Gabriel Paz leh Denilson Rodrigues Roldao te an lalut a, Senegalese player Seila Toure te an neih belh bakah East Bengal player hlui Peka Guite an neih belh bawk. Mizo club squad hi a chhah sawt a, chutihrualin player tharte hi MPL-a ziah luh an nih loh avangin team angin training an nei thei lo thung.

Mahse, Mizo club tan chhuanlam neih a thiang lo a, Mizoram aiawh feh chhuak an nih avangin an chungah Mizo mipui beiseina a sang dawn. MPL best player Lalthanzuala, best midfielder Lalliansanga (Buanga), best goalkeeper Zothanmawia bakah emerging player Mesak C. Lalrinngheta te chungah entu mipui mit a fu dawn. Chutihrualin hliam vangin Buanga hi a inlan a rinawm loh zawk.

Shillong Lajong hian game rang ṭha tak an khel a, season liam ta khan champion thei dinhmunah an ding hial. Kumin hian match hmasa berah ISL aṭanga tla thla hlim Mohammedan SC chu khualmualah an hneh nghal a, Mizo player pahnih midfielder Emmanuel Lalchhanchhuaha (Pehlawn) leh left back Ephraim Lalremtluanga (Champhai) ten hmun pawimawh an chang.

Shillong-in match khat an khelh tawh bakah result ṭha an neih avangin inrintawkna an ngah dawn a, ṭantu an neih ṭhat avangin Chanmari tan Shillong-a point hmuh hi a harsa ang. MPL champion Steven Dias-a hoten IFL match hmasa berah fiahna hautak an hmachhawn nghal dawn.