India-in Pakistan an ngam

SAFF Championship-a an match hmasa berah India chuan 3-2 in Pakistan an hneh a, SAFF champion ngun ber tan semifinal lut turin kawng a inhawng zau nghal hle.

India hian Pakistan hi an sawp dawn niin a lang hman - minute 19 chhungin Blue Tigers tan Suhail Ahmad Bhat chuan goal hnih a khung a, minute 31-naah Manglenthang Kipgen chuan a belhchhah leh bawk.

Mahse, India-in goal dang an khung belh thei tawh lo a, hun pek belhah Pakistan an 'comeback' ṭep! Pakistan hian goal hnih an rawn khung a, an harhchhuah a tlai hret avangin India tan a pawi phak tawh lo.

Pakistan tan Najeeb Ullah chuan hun pek belh minute khatnaah si phurh a sut ṭhen a, minute thum hnuah Alamgir Ghazi chuan a khung belh ve leh bawk - India an hlauthawng hman a, mahse, hun a tlem tawh hlauh a, Blue Tigers an him hram.

India tana bul ṭan zingah Hmingthanmawia Ralte (Valpuia) a tel a, Mumbai City fullback hian minute 90 a khel tluan - India hian November 11-ah Maldives an hmachhawn leh dawn a, draw ringawt pawhin semifinal an lut tawh dawn.

Bangladesh-a khelh SAFF Championship-ah hian ram paruk awmin, India leh Pakistan bakah India bakah Bangladesh, Sri Lanka, Bhutan leh Maldives an ni a, group pahnihah ṭhen hran an ni - group pahniha a sang pahnih hian semifinal an khel zui dawn

a ni.