Bayern-ah Kane-a'n a hun tawp hman a tum?

Harry Kane chuan Bayern Munich-ah a nghet tih lantirin contract thar a ziak a, kum 2029 thleng German club-a châm turin thutlukna a siam. A contract hi a hmang zo a nih chuan kum 36 mi a ni ve tawh dawn a, Bayern-ah a retire hmel ta hle.

Kum 33 mi Kane hian nomawi chawi a duh avangin kum 2023 khan Tottenham Hotspur chhuahsanin Bayern hi a zawm a, khatihlaia a man zat chu pound maktaduai 86 zet a tling.

Allianz Arena-ah Kane a vul nghal a, tun thlengin inelna hrang hrangah match 161 inlan tawhin goal 156 a khung tling tawh. Season hmasa khan match 51 aṭangin goal 61 a khung a, club record siamin Ballon d'Or a dawng nghe nghe.

English forward chuan, "Bayern hi ka in angin ka ngai a, club bakah fans leh Munich khawpui hi ka ngaina takzet. Vincent Kompany hnuaiah team ṭha tak kan ni a, he club tana ka khel thei hi ka inchhuang em em zawk a ni.

Ka chhungte pawhin helai hmun hi nuam an ti a, châm chhunzawm zel pawh kan duh. Tun dinhmunah chuan he club tana nomawi tam thei ang ber chawia, a sang thei ang ber thlengpui hi ka thupui ber a ni," a ti.

Contract thar a ziah hmain Kane hian kum khat daih chauh contract a nei tawh a, Barcelona bakah Saudi Pro League club te nen sawi zawm a ni hman. Mahse inremna thuthlung a ziah takah chuan an rim chhunzawm a rinawm tawh loh.

Kane hian a contract tharah £400,000 a hlawh pha dawn a, Erling Haaland leh Kylian Mbappe te aia a hlawh hnem dawn avangin Europe a footballer hlawh hnem ber a ni dawn bawk.

Spurs forward hlui hian Bavarians a zawm hnuah Bundesliga nomawi pahnih a chawi tawh a, German Cup-ah vawi khat a champion tawh bakah Ballon d'Or a dawng tawh. Champions League chiah chu Bayern tan a champion lohna awmchhun a ni a, inkhelh a chawlhsan hma ngeia UCL nomawi chawi tumin a bei dawn.

Kumin Bayern hi Europe-a team hmuhnawm ber zinga mi an ni a, Thawhlehni zan khan Atletico Madrid chu 2-0 in an hneh. Chutihrualin tun season UCL-a vawi hnih an chakna chauh a ni a, table-ah 13-naah an awm mek. Bundesliga-ah erawh hmahruaitu an ni.