Vawiin aṭangin Inter Village Futsal last 16

MBOCWWB MFA Inter Village Futsal Tournament 2027-ah vawiin aṭangin last 16 khelh ṭan a ni dawn a, R. Dengṭhuama Stadium-ah futsal hmuhnawm thlir tur a awm dawn. Inkhel hi BR Studio YouTube channel-ah live-a pekchhuah a ni.

November 4, Nilaini khan team ṭha an tlak belh a, Durtlang leh Republic Veng te hnung zuiin futsal thiam veng Zonuam leh Durtlang Leitan te an tla. Chutihrualin champion beiseiawm zinga mi Electric Veng, Tlangnuam leh Sihphir Venghlun te an la dam a, inelna boruak a nung zel ang.

Vawiin hian match li khelh a ni dawn a, tlai dar 4:00 aṭangin inelna ṭan a ni chauh dawn. Match tawp berah Zemabawk North leh Sihphir te an inkhel dawn a, zan dar 8:00-a inkhel tur hi en châkawm ber a ni a, chak tur pawh hriatthiam a har hle.

Chutihrualin Aizawl khawchhung leh pawnah futsal ground a tam a, eng team mah dah hniam a thiang tawh lo. Khatla leh Reiek te pawh intluk tawk tura ngaih an ni a, champion beiseiawm erawh an ni pha lo. Chhinga Vengin team ṭha Venghlui hneh mah se futsal ṭantirh aṭanga team ṭha ni pha Muthi lakah erawh chak a harsa ang.

Sakawrtuichhun leh Rangvamual te inbuk tawk viau tura ngaih a ni. Seeded siam a nih loh avangin vawiin inkhel turah team ṭha an tam lo a, November 7, Inrinniah team ṭha rual an inlan dawn.