Spurs chakna Victor Wembanyama

Victor Wembanyama chuan nimin zing NBA inkhelah San Antonio Spurs tan point 52 zet a score a, a career-a game khata a score hnem ber ṭum a ni. Wemby hian rebound vawi 24 zet lain vawi riat block a nei bawk a, Dallas Mavericks lakah a team chu 112-111 in a chakpui.

Frost Bank Center, San Antonio-a inkhelah Spurs-in bul an ṭan ṭha a, Wemby leh Dylan Harper te point score lamah harsatna an tawk lo a, Wemby hahchawlh laia a aiawhtu Luke Kornet a ṭangkai viau bawk.

Mavericks tan hliam vanga rei tak a chawlh hnua lo kir Kyrie Irving a la hmuhnawm reng a, Naji Marshall leh PJ Washington ten Kyrie thlawp ṭha mah se first quarter-ah 32-26 in an hnufual zawk.

Second quarter tir lamah Spurs an inthlahdah a, Mavs tan Kyrie Marshall ten hma an sawn bakah Rookie of the Year ni lai Cooper Flagg insiamṭha chho bawkin, 49-48 in an khingpui team an hnaih hman.

Mahse Spurs tan Wemby a inlar ṭan a, French center hian a zawna Flagg, Washington leh Gafford te a block-in a teammate te a tihphur thar a, an khingpuite ball a chhuhsak theih bakah point a score tel zel a, Stephon Castle-a'n point nei chhoin 68-51 a hmahruai chungin chawlhlawk an hmang.

Third quarter-ah Wemby a chawl rei a, mahse a luh chhunah dan hleihtheih loh khawpin a khel ṭha. Chutihrualin a ṭhiante thlawpna a hmuh ṭhat tawk loh avangin Spurs-in point an nei tlem zawk a, 90-80 in Mavs-in an inthlauhna an tizim.

Fourth quarter tir lamah pawh Kornet a lut hmasa zawk a, Mavs-in Wemby awm loh lai hmang ṭangkai. Flagg-a kut a kal laklawh tawh a, a team hma a hruapui hman hial. Mahse court chhunga Wemby a lo kir hnuah Spurs-in hma an hruai leh nghal.

Hun tawp lamah Wemby a che ṭha zual a, chutihrualin minute hnih pawh awm tling tawh loah an basket a tang rei a, Mavs player te hlah hnem avangin an vannei tel.

Second 10 awm tling tawh loah 112-111 a ni a, Kyrie-a'n a team chakpui theihna hun ṭha nei mah se a hlah a, hun a tawp zui nghal avangin Spurs-in hnehna an chang.

Kum 22 mi Wemby chuan, "Ka dam ṭhat loh avangin match tir lamah ka khel ṭha tawk lo a, mahse tunah chuan ka dinhmun a ṭha leh tawh a, vawiina ka khelh ang hian chhunzawm zel ka duh," a ti.