Jay Rodriguez-a'n inkhelh a chawlhsan

Southampton forward hlui Jay Rodriguez chuan kum 37 mi niin inkhelh a chawlhsan thu a puang a, Wrexham forward hian inkhelh zui zel a tum tawh lo.

Rodriguez hian Burnley-ah a career a ṭan a, kum 2007 leh 2012 inkarah Clarets tan match 105 khelin goal 31 a khungsak a, 2008 leh 2010-ah Stirling Albion leh Barnsley-ah loan-in a chhuak bawk.

Kum 2012 khan khatihlaia Premier League kai thar Southampton a zawm a, hei hi khawvelin a hriat ṭanna a ni. 2013-14 season khan Saints tan Ricky Lambert leh Adam Lallana te nen inkawpin, table-ah pariatna an ni phâk a, Rodriguez hian goal 15 a khung nghe nghe.

Saints an chet ṭhatpui avangin player tam tak chu club lian zawkah an chhuak a, Rodriguez pawhin sawmtu nei mah se hliamin a tlakbuak avangin Southampton-ah a châm.

English forward hian ngai a awh leh tawh lo a, 2017 khan West Bromwich Albion zawmin kum hnih a khelhsak. Hawthorns tan khel chhe lo mah se 2019 khan a club hlui Burnley-ah a kir.

Turf Moor-ah kum ruk a awm hnuin nikum khan Wrexham a zawm leh a, Red Dragons (Wrexham sawina) tan match 24 khelin goal hnih a khungsak hman a, a club hnuhnung ber a ni zui.

Rodriguez hian kum 2011 khan England Under 21 tan match khat a khel ve hman a, Three Lions senior team tan pawh vawi khat inlan vein November 2013 khan Chile nen friendly match an neih ṭumin Lallana a thlak.