Ramhlun North-in MPL an hnaih

Mizoram chhunga football inelna sang ber Mizoram Premier League khel tur zawnna qualifier chu nimin khan RG Stadium-ah khelh ṭan a ni. Season thara MPL khelh tum team pathum an awm a, Aizawl club pahnih Ramhlun North leh Bawngkawn FC bakah Lunglei club SYS FC ten inelna hi an hmachhawn.

Nimin inkhelah hian Ramhlun North-in ADFA First Division semifinal phuba an la a, Bawngkawn FC lakah 2-0 in hnehna an chang. Coach Lalchhuanawma Pautu (LCh-a) hote tan Lalremruata leh Malsawmzela ten goal an khung.

RG Stadium-a inkhelah Bawngkawn lamin chance an nei hmasa a, First Division final-a man of the match Lallawmsanga'n chance ṭha a hlah. LS-a hi inhliam vangin second half-ah a khel chhunzawm thei lo. Ramhlun North-in minute 75-naah Remruata hmangin hma an hruai a, Malsawmzela'n minute kaw hnuah a khung belh leh bawk avangin 2-0 in an chak.

Bawngkawn tan MPL khelh beiseina nei turin vawiin hian SYS FC an hneh ngei a ṭul dawn. Chutihrualin SYS FC hi MPL11 leh MPL12-ah Mizoram chhunga football inelna sang ber khel tawh an nih bakah kum tluana training nei an nih avangin ADFA First Division champion tan point thum hmuh hi a awlsam lo ang.

Qualifier-ah hian team pathum hi vawi khat ṭheuh an inkhel kual dawn a, a sang berin season tharah MPL a khel dawn. Tun inelnaa pahnihna hian MPL14 Qualifier-ah MLS FC nen double legged playoff an khel ang.

MPL season tharah Aizawl FC an awm dawn tawh lo a; champion lai Chanmari FC, Mizoram Police FC, Dinthar FC, Ramthar Veng FC, Saikhamakawn FC leh Kanan FC bakah MPL14 Qualifier leh Playoff-a tlingte an tel bawk dawn a ni.