Inter Village Futsal - Team ṭha inlan hun

MBOCWWB MFA Inter Village Futsal Tournament 2027-ah vawiin hian last 16 khelh chhunzawm a ni dawn a, team ṭha inlan tur an tam avangin R. Dengṭhuama Stadium-ah futsal hmuhnawm thlir tur a awm ang. Inkhel hi BR Studio YouTube channel-ah a thlawna en theih a ni.

Tlai dar 4:00-ah Electric Veng leh Chanmari an inkhel dawn a, veng ṭhenawm an nih vang chauh ni loin futsal thiam veng an nih avangin a hmuhnawm dawn. Third round-ah Electric Vengin team ṭha Republic Veng an hneh a, Chanmari pawhin team ṭha Durtlang an hneh ve bawk. Mahse, hahdamna hun an nei dawn lo - champion team zinga mi pakhat an tla leh dawn.

Tlangnuam leh Aizawl Venglai LC te inkhel hmuh tur a awm lehnghal dawn. Team ṭha ve ve an ni a, Tlangnuam hi India ram pum huapa futsal-a champion thei club neitu an nih avangin an buk a rit dawn. Chutihrualin tuna inelna erawh veng hlang a ni a, Aizawl Venglaiin training an neih ṭhat bakah club level-ah pawh futsal team ṭha tak nei veng an nih avangin Tlangnuam hneh thei tur team an ni.

Sihphir Venghlun leh ITI Veng te zan dar 6:45-ah an khel dawn a, futsal-a an sulhnu thlir chuan Sihphir Venghlun buk a rit hle. Mahse, ITI Veng hian third round-ah Zotlang 11-0 in an hneh tlat a, thilmak an thlentir thei tlat. Match tawp ber erawh en châkawm ber a ni lo a, Ramhlun Sports Complex leh Saikhamakawn te an inkhel dawn. SKK hian MPL club an neih avangin team ṭha tan pawh khelh an harsa dawn a, RSC aiin an buk a rit zawk ang.