Bagan-in Odisha an hneh

Indian Super League inkhelah Ningani zan khan Mohun Bagan an inlan a, an mikhual Odisha chu 3-2 in an hneh - Kolkata club tan Dejan Drazic chuan goal hnih khungin, Lee Erwin chuan goal khat a thawh bawk a, Odisha tana Mahmoud Eid leh Everton goal khungin awmzia a nei phak lo.

Mohun Bagan tan damlohna avangin Lalengmawia Ralte (Apuia) a la inlan thei lo a, Lallianzuala Chhangte chu bench aṭangin a lut thung - Drazic-a goal hnihna hi Lunglei tlangval siamsak a ni a, khatihlai kha 1-1 a team pahnih an la inhnehtawk lai a ni a, Lianzuala inkhel a thlak danglam.

Lianzuala hian goal khung theihna chance pawh a nei a, mahse, tun season-a Kolkata club pantu LZa vanneih zan a ni lo. Odisha tan captain K. Lalṭhathanga (Puitea), Jeremy Zohminghlua leh K. Lalrinfela ten inkhel bul an ṭan a, an team erawh an chakpui zo ta lo.

NorthEast United pawhin season duhawm tak an hman chu an chhawm nung zel a, Churchill Brothers chu 2-0 in an hneh ve bawk - Highlander tan Ethyan leh Antonio Moyano ten goal khat ve ve an khung a, Goa club-in a chhanletna tur an nei lo.

Ningani zan ISL inkhel hmasa zawkah hian Highlander tan striker Lalrinzuala chu bench aṭangin a lut a, Mizo player dang inlan an awm lo thung.