Tlarhnung siamrem a ngai - Alonso

Chelsea manager Xabi Alonso chuan tun season-a goal an chhuah hnem lutuk chu insiamrem an mamawh thu a sawi a, Spanish coach chuan, "Tlarhnungin goal an chhuah hnem chhan hi thil pakhat vang chauh a ni ngai lo a, chu chu siamrem kan tum dawn a ni," a ti.

London club hi Premier League table-ah palina ni mek mah se, match kua an khelh tawh aṭangin goal 15 ngawt an chhuah tawh a, tun season EPL-ah anni aia goal chhuah hnem chu Ipswich Town (18 goals), Coventry City (16), Crystal Palace (21) leh Sunderland (17) an ni a, Palace leh Black Cats hi relegation zone-ah an awm mek.

Alonso chuan, "Kan goal chhuah tam lutuk tihbo tumin theihtawp kan chhuah mek a, ball chan loh laia kan shape leh positioning-ah te nasa takin kan inzir mek. Kan goal chhuah tam zawk hi kan khingpuiin tlarhnung an ṭhiah vang ai mah chuan kan tihsual ho te te aṭanga thleng a ni. Mahse, siam ṭhat theih a ni tihna a ni a, chu chu a lawmawm lam a ni," a ti.

Chelsea manager chuan, "A pawimawh ber chu team anga kan khelh a ni a, goal hmaah thutlukna dik kan siam fo a ṭul bawk. Defending hi tlarhnung player pali hna bik a ni lo a, tlarhma aṭanga inṭan a ni - kan nawr dan leh ball hloha kan um let danin thui tak a hril.

"Goal chhuah loh tawp chu a theih loh ang a, mahse, chhuah tlem erawh a theih ang. Team anga hei hi kan zir thiam hunah clean sheet chu kan nei fo ang," a ti a, beiseina a nei.

Chelsea hian an league match hnuhnung berah Manchester United chu 2-0 in an hneh a, European football an khelh loh avangin kar laihawlah match hahthlak an nei ve lo - Pathianni zan dar 7:30-ah Sunderland an lenchilh zui ang.