Atletico muala leng tur Barca

Spanish champion Barcelona chuan Pathianni zan dar 1:30 hian Atletico Madrid an lenchilh dawn a, Atletico an chak chuan La Liga hmahruaitu thar an nih theih dawn avangin inkhel hmuhnawm a beisei ngam.

Rinhlelhawm Barca

Tun season-ah Barca an che ṭha a, La Liga leh Champions League-ah hneh loh nei loin rei tak an kaltluang hman. Mahse UCL-ah champion lai Paris St-Germain an hneh lo a, insiamṭhat an tum lai takin an hmelma Real Madrid lakah an tlawm zui.

A zawna vawi hnih an tlawm hnuah Catalan club hian Alaves leh Aston an hneh leh tawh a, mahse zanina an hmachhawn tur hi an hnuai chiaha awm Atletico an ni a, khualmuala khel tur an nih bawk avangin awlsam takin Diego Simeone naute hi hneh theih an ni dawn lo.

Hliam an ngah

Thawhlehni zana Villa an hneh ṭuma inhliam Rodri a khelh theih a beiseiawm loh a, Spanish midfielder hian a ke dinglamah hliam a tuar a, a lo kir hun tur sawi theih a la nih loh avangin Frenkie de Jong-a mawhphurhna a sang sawt dawn.

Dani Olmo leh rawlthar duhawm Xavi Espart te chu tun thla chhung an chawlh a ngai dawn a, Andreas Christensen, Jules Kounde leh Eric Garcia te dinhmun a chiang lo bawk.

Chutihrualin an tlarhma lam an dam ṭha a, goal 15 khung tawh Raphinha leh goal 10 khung tawh Lamine Yamal te bakah tun hnaia che ṭha tak, Fermin Lopez leh Anthony Gordon te an la neih cheu avangin Hansi Flick-a tan hlauhthawnna tur a awm lo.

Hello Atletico

Atletico-in season duhawm tak an hmang ve bawk a, vawi khat chiah chak loh neiin vawi khat draw an nei tawh bawk a, an match hnuhnung pangaah chak vekin, Barca hneh loh Real hneh theitu an nih avangin inrintawkna an ngah dawn.

Atletico erawhin hliam an ngah lo a, defender Cristian Romero, midfielder pahnih Johnny Cardoso leh Koke te chu Barca laka an inlan thei dawn lo, midang erawh an dam thung.

Madrid club hian Barca aiin a letin goal khung tlem zawk mah se goal riat chiah an la chhuah a, La Liga-ah anni aia chhuah tlem an awm lo, zaninah pawh an tlarhnung phui tak chu an innghahna a ni leh ang.

Tlarhma lamah Julian Alvarez chu an hmachhuan ber a ni leh dawn a, Manchester City forward hlui hi nipui laia Barca nen sawizawm a lo nih tawh avangin en bik a hlawh dawn a, goal a khung a nih ngat chuan Barca tan a na khawp ang.

Kum 26 mi Alvarez hi a hnampui Giuliano Simeone, Lee Kang-in leh Alex Baena ten an thlawp thei dawn a, striker palian Alexander Sorloth a la awm bawk avangin Barca tlarhnung su hawng turin an ṭha tawk.