MPL khel tur vawiinah chiang dawn

Mizoram Premier League khel tur zawnna qualifier-ah Inrinni khan Bawngkawn FC-in SYS FC 5-4 in an hneh a, ADFA First Division champion hian playoff khelh beiseina sang tak an neih phah. Chutihrualin Ricky Lallawmawma kaihhruai Bawngkawn hi qualifier-ah pakhatna an ni thei tawh lo a, vawiin tlai dar 2:00 hian SYS leh Ramhlun North ten qualifier kaltlanga MPL khel tur an zawng dawn.

MPL14 qualifier-ah hian team pathum Ramhlun North, Bawngkawn leh SYS FC te an tel a, vawi khat ṭheuh inkhelh kual hnuah point hmu sang berin MPL an khel dawn. Bawngkawnin match hnih an khel tawh a, SYS lakah chak mah se Ramhlun North lakah 2-0 a an chak loh avangin pahnihna bak an beisei thei tawh lo.

MPL-a tawnhriat nei tawh SYS FC lam hian player thar ṭhahnem tak an chher leh tawh a, tun ṭumah V. Lalhmingmuana'n (V. Muana) tawnhriat a ngah deuh a, player dang zawng erawh kum naupang tak vek an ni. Heti chung hian tawnhriat nei ṭha zawk Bawngkawn lakah huaisen takin an khel a, goal nga chhuah mah se goal li an khung a, MPL khelh beiseina an la neih phah.

Chutihrualin chance nei ṭha ber erawh ADFA League Winner Ramhlun North an ni. Lalchhuanawma Pautu (LCh-a) enkawl RNFC te hi an chak emaw SYS nen an inhnehtawk emaw a nih chuan pakhatna an ni ang a, Lunglei club SYS hi an tla ang.

SYS hi an chak a nih thung chuan an chakna zat a pawimawh dawn. Lunglei club hi 1-0 a an chak a nih chuan Ramhlun North pakhatna an ni tho ang a, SYS hi pahnihnaah awmin Bawngkawn tan beisei tur a awm dawn lo. SYS hi goal hnih china an chak chuan an tling nghal thei dawn a, Ramhlun North-in playoff an khel dawn.

Chutihrualin SYS hi goal li china an chak chuan Ramhlun North hian playoff an khel pha dawn lo a, Bawngkawn FC-in an khel thung ang. Playoff-ah hian qualifier-a pahnihna leh MLS FC te an inkhel dawn. Lawngtlai club hi table mawngphahah awm mah se Aizawl FC thuneituten Nagaland United hnenah IFL khelh phalna bakah CRS an hralh tel avangin MLS hi an vanneih phah ta a ni.

MPL season tharah Aizawl FC an awm dawn tawh lo a; champion lai Chanmari FC, Mizoram Police FC, Dinthar FC, Ramthar Veng FC, Saikhamakawn FC leh Kanan FC bakah MPL14 Qualifier leh Playoff-a tlingte an tel ang.