Ṭhazuala hming a mawi leh ta

Mizo shuttler ṭhangduang leh hmabak nei êng H. Lalṭhazuala chuan Telangana International Challenge-ah bronze medal a hlap chhuak a, kum 2026 hi Chanmari West rawlthar tan kum ṭha ti hiala chhal tlak a ni.

Ṭhazuala hian September thla khan Cameroon International Cup 2026-ah gold medal hlap chhuakin, August thla khan Nigeria-a neih Lagos International Badminton Classics-ah silver medal a hlawh bawk - international inelnaah bronze a la leh ta.

Mizoram Badminton Association, NEIDA, Tata Trusts leh MSSC thawhhona aṭanga badminton zir chhuak Ṭhazuala hian quarterfinal-ah Badminton Association of India (BAI) ranking-a no. 1 Ginpaul Sonna a hneh thei a, beiseina a sang hman hle.

Mahse, semifinal-ah rin loh takin a vanduai zawkah a ṭang a, BAI ranking-a no. 10 Tushar Suveer a ngam lo. 21-14, 21-19 in a chak lo zawkah ṭangin, bronze medal-ah lungawi a zir a ṭul ta a ni.

Ṭhazuala hi BAI ranking-ah number 25 a ni mek a, Badminton World Federation (BWF) men' singles-ah number 154-na a ni mek - bronze a lak leh tak avangin top 100 a hnaih zel ang.