Vawiinah Inter Village Futsal Quarterfinal

MBOCWWB MFA Inter Village Futsal Tournament 2026 quarterfinal chu vawiin hian R. Dengṭhuama Indoor Stadium-ah khelh a ni dawn a, inkhel hi BR Studio YouTube channel-ah live-a pekchhuah a ni ang.

Champion rinkai zinga mi Electric Vengin harsatna nei loin an ṭhenawm Chanmari 4-0 in an sawp a, vawiin tlai dar 4:00 hian Sihphir hnehtu Zemabawk North an hmachhawn dawn. Electric Veng buk a rit zawk a, chak chiang erawh an ni lo.

Aizawl Venglaiin an thawhrim rah an seng chho zel a, last 16-ah team ṭha Tlangnuam lakah penalty shootout hmangin an vannei. Vawiin tlai dar 5:15-ah Aizawl Venglai hian team nem zawka ngaih Sakawrtuichhun an hmachhawn a, tha thlah erawh a rem lo ang.

Sihphir Venghlunin champion zia chhuahin last 16-ah ITI Veng 7-4 in an hneh a, Muthi nen zanin dar 6:45 hian an inhmachhawn dawn. Futsal inelnaah Muthi dah hniam theih an ni lo a, Sihphir Venghlun laka 'upset' thlentir turin an ṭha tawk.

Saikhamakawnin khelh dan nghet an nei a, champion rinkai ni pha lo mah se last 16-ah Ramhlun Sports Complex lakah 3-1 in an chak. Zanin match hnuhnung berah Reiek an hmachhawn dawn a, futsal hmuhnawm a beisei theih ang. Reiek lamin hruaitu an nei ṭha a, inbuatsaihna nei ṭha zinga mi an ni a, SKK hneh a semifinal thlen phak ngei an tum dawn a ni.