ISL-ah goal a sur

Indian Super League kartawp inkhelah goal a lut hnem hle - match thum a awm a, goal 14 ngawt a lut! Inrinni zan inkhelah Chennaiyin chuan 5-3 ngawtin East Bengal an hneh a, Kolkata club tan David Lalhlansanga'n goal khung mah se, awmzia a nei phak lo.

Chennaiyin tan Brison Fernandes chuan minute 18 chhungin goal hnih a khung a, East Bengal tan Ake Loba chuan minute 29-naah chhanglet mah se, Ramon Tanque chuan penalty hmangin, minute 41-naah a belhchhah.

South Indian club-in 3-1 a hmahruai chungin chawlhlawk an hmang a, mahse, a la tawp lo. Second half ṭan aṭanga minute hnihna lekah Dani Ramirez-a'n penalty aṭangin East Bengal tan a khung leh a, 3-2 a la ni cheu.

Chennaiyin tan Irfan Yadwad a inlar zui a, goal hnih a khung a, Kolkata club beiseina a titawp - hun pek belha Vairengte tlangval David Lalhlansanga goal khung chu mualpho zualpui khuhna chauh a ni tawh.

South Indian club tan PC Laldinpuia leh Ayush Chhetri ten inkhel bul ṭanin, C. Lalhriatpuia chu bench aṭanga luhtir a ni a, Irfan-a goal khung pakhat zawk chu Hriata siamsak hi a ni - East Bengal tan Lalchungnunga'n bul ṭanin, Edmund leh David te bench aṭangin an lut thung.

Inrinni zan inkhel hmasa zawkah SC Delhi chuan 3-0 in Inter Kashi an hneh a, Carlos Fortes, Juan Peña leh Rodriguinho ten goal khat ṭheuh an khung - Delhi tan Lalrinliana Hnamte chuan bul ṭanin, Augustine Lalrochana chu bench aṭangin a lut a, Inter Kashi tan Laldinliana Renthlei chuan bul a ṭan bawk.

Zirtawpni zanah FC Goa chuan mikhual Bengaluru an ngam lo - Bangalore club tana Borja Martínez goal hmahruai khung chu Franchu-a'n sut mah se, Soham Varshneya chuan hun pek belhah Bangalore tan chakna goal a khung.

Goan club tan Isak Vanlalruatfela'n bul ṭanin, KC Malsawmsanga chu bench aṭangin a lut a, Bengaluru tan Lalremtluanga Fanai chuan bul a ṭan bawk - Borja goal khung chu a siamsak a ni.