Roma ngamtu an la awm lo

Inrinni zan Serie A inkhelah AS Roma chuan 3-0 in an mikhual Sassuolo an hneh a, Gian Piero Gasperini naute hi season kal mekah tlawm nei loa an kal lai chu an chhunzawm.

Roma tan Mario Hermoso chuan minute 27-naah goal hmahruai a khung a, goal riat khung tawh Donyell Malen-a'n khung belh chiah lo mah se, a cross chu Sassuolo defender Sebastian Walukiewicz-a'n an lamah a tilut.

Dutch forward Malen hian vawi thum ngawt goal khung theihna hun ṭha a bawhpelh a, counter attack aṭanga Matías Soulé cross chu Aston Villa forward hlui hian goal ruakah a khung thei lo a, a vanneih zan a ni lo.

Minute 58-naah Rodrigo Mora chuan an goal thumna a khung a, Portuguese rawlthar tan tun season Serie A-a a goal lina chiah a ni. Hun tawp thlenga Sassuolo-in goal an khung ve theih loh avangin nuamsa takin Roma an chak.

Roma bakah hian Lazio chu hneh loh nei lo awmchhun an ni a, Lazio hi hmahruaitu an ni thung. Roma hian champion lai Inter Milan lehpelin table-ah pahnihnaah an chho a, nizana Inter result a zirin an dinhmun hi a danglam leh thei thung.