Aizawl FC rawlthar hun a thleng ta

Mizoram Premier League Under 18 chu nimin tlai khan a hmawr bawkna neih a ni a, a vawi khat nan Aizawl FC an champion. AFC hian final hmuhnawm takah Chhinga Veng chu penalty shootout hmangin 3-2 in an hneh.

Lammuala inkhelah Chhinga Veng lamin Lalremruata hmangin goal hmahruai an khung a, second half-ah AFC lamin Jehova Lalthansanga hmangin an sut. Hun pangngaiah goal a luh belh lo a, extra time khelh a ni. Extra time-ah Chhingcows bawk che fuhin Lalhriatpuia hmangin a vawi hnih nan hma an hruai. Mahse, AFC lamin hun tawp hma deuhin K Lalfamkima penalty hmangin an sut leh a, 2-2 in an inhnehtawk - penalty shootout-ah AFC an vannei zui bawk.

Team ṭha 

Team pahnih hi league round khelh zawh takah pawh team ṭha pahnih an ni, a chung berah Aizawl FC awmin an hnuai chiahah Chhinga Veng an awm thung - an intawn hmasak pawhin 3-3 in an inhnehtawk. MPL Under 18 hi a tir lam season pahnihah chuan kum 17 hnuai lam inelna atan buatsaih a ni a, a hnuah erawh kum 18 hnuai lam tana thlak a ni thung. Tun hmain Chanmari FC, Chhinga Veng leh Mizoram Plice te vawi hnih ṭheuh an champion tawh; AFC leh Bethlehem Vengthlang te vawi khat an champion ve ta bawk a ni.

Champion    Aizawl FC, Rs 20,000

Pahnihna    Chhinga Veng FC, Rs 15,000

Fairplay    Chhinga Veng FC, Rs 5,000

Best Goal Keeper    R. Lalnunmawia, Ramhlun North FC, Rs 1,000

Best Defender    Lalmuanfela, Aizawl FC, Rs 1,000

Best Midfielder    Gratus Lalhnehliana,  Aizawl FC, Rs 1,000

Best Forward    K. Lalfamkima, Aizawl FC, Rs 1,000

Semi Finalist    Ramhlun North FC & Electric Veng FC, Rs 3,000