Rin hlawh lo pahnih an chak

ATP Finals khelh laiah Thawhṭanni zan khan pleyer beisei hlawh lo zawk pahnih Alexander Zverev leh Stefanos Tsitsipas te chuan hnehna an chang a, semifinal luh tum inum boruak a ti ngaihnawm zual ang.

O2 Arena, London-a inkhelah world number 1 Rafael Nadal chu Zverev lakah 6-2, 6-4 in a chak lo. Inkhel dangah Daniil Medvedev chu Stefanos Tsitsipas-a'n 7-6 (7-5), 6-4 in a hneh ve bawk a ni. US Open nomawi a chawi hnuah Nadal hian tournament khelh tluan a la nei leh lo a, tun hnai mai khan Paris Masters-ah pawh semifinal aṭangin a inhnukdawk. Hliam dam hlim ni chungin London khawpuiah a inlan a, group match hmasa berah beisei a phak lo.

Grand Slam vawi 19 champion tawh Nadal hian world number 1 ni chunga season khar a duh a nih chuan chak a mamawh, ranking lama a elpui Novak Djokovic chuan a match hmasa lamah hnehna a lo chang tawh a ni.

Nadal chuan, "Taksa lam nawm lohna leh hliam chu chhuanlama hman ka tum lo, mahse ka ṭhat dan ber chu a ni rih lo a ni. Tuna ka mamawh ber chu group match pahnih ka khelh leh turah hian a ṭha thei ang bera khelh a ni  ang," a ti. Spanish tlangval hian a match hnihna atan zanin dar 7:30 hian US Open final-a a hneh tawh Medvedev a hmachhawn dawn, Russian tlangval hi tun season chawhnu lama player che ṭha berte zinga mi a nih avangin a awlsam dawn lo hle a ni.

Kum 23 mi Medvedev hian amah ang thoa ATP Finals vawi khat khelhna Tsitsipas a ngam lo a, Greek tlangval Tsitsipas hi a khelh fuh ṭum chuan player ṭha dangte hneh thei tura theihna nei sang a ni. ATP Finals-ah hian player ranking sang zual pariat an inlan a, group pahnihah pali ve ve a ṭhenhran an ni. Group pakhata awmkhawm hi vawi khat ṭheuh an inkhel kual dawn a, chumi hnuah a sang pahnih zelin semifinal an lut ang - season kharna a nih avangin ngaihhlut a hlawh ṭhin.