Nungchang mawi lo vangin Sterling hrem

Manchester City forward Raheem Sterling chu Liverpool defender Joe Gomez laka a chet mawi loh avanga hrem nan England squad aṭanga paih a ni a, Sterling chuan Gomez hnenah ngaihdam a dil tawh thu a sawi zui. 

Khawthlang media-te tarlan danin Gomez hian training ground St George's Park-a canteen-ah Sterling chu chibai tumin hnung lam aṭangin a va kuai a, English forward hian a ṭhianpa hi a nghawngah a lo rek a ni. Pathianni zan Premier League inkhelah Liverpool chuan 3-1 in Manchester City an hneh a, he inkhelah hian Gomez leh Sterling hi an intibuai. Hun tawp hnuah inremin an in chibai a, mahse England camp-a an luh hnuah Sterling hian a thinrimna a thup zo lo. 

Football Association chuan, "Team private area-ah buaina a siam avangin squad aṭanga paih a ni," tiin an sawi a, England boss Gareth Southgate chuan, "Montenegro laka Sterling khelh loh hi a ṭha berin ka hria a ni," a ti. 

Sterling chuan, "Joe nen hian ṭha takin inbiakna kan nei a, ngaihtuahnain rilru zawng zawng a luah theihna infiamnaah kan tel a, ka rilru a lo kal khat mah mah a ni. Joe Gomez nen buaina kan nei lo a, second nga emaw 10 lek thil thleng satliah a ni tih kan pawm," a ti. 

Liverpool player hlui Sterling leh Gomez inremna kawngah hian Reds Captain Jordan Henderson chu tha thawhtu ber niin an sawi a, Montenegro nena an inkhelh turah hrem a nih avangin squad la zawm ve lo mah se player pahnih hi phone-a biain training ground a pan nghal a ni. 

England hian Ningani zan dar 1:15-ah Montenegro an mikhual dawn a, international match 1000 an khelh tlinna inkhelah hian point an hmuh chuan Euro 2020 khel turin an tling chiang ang.