Valpuia'n India team a chhuahsan

SAFF Championship khela feh chhuak, Mumbai City fullback Hmingthanmawia Ralte (Valpuia) chuan India squad a chhuahsan a, Durtlang tlangvalin India team a chhuahsan chhan erawh club lamin an koh kir vang a ni.

India-in SAFF Championship a khelh bakah New Zealand-ah tour an nei dawn bawk a, hei vang hian tun hnaiah squad pahnih koh niin, Bangladesh-a neih SAFF-ah hian Valpuia chu India tana inlan tura koh zingah a tel.

SAFF Championship ṭan a nih khan international break neih a la ni lo a, hei vang hian club ṭhenkhat chuan an player an chhuahtir phal lawk lo. Hetihlai hian Mumbai City player-te erawh squad zawm hmasa zingah an tel a, mahse, AIFF nen international break ruala kir leh turin an inrem thung!

AIFF leh Mumbai City inremna hi a mak angreng a, match hmasa bera Pakistan an hmachhawn ṭum pawh khan player 15 vel bak India hian an nei lo - Valpuia pawh bul ṭan zingah a tel a, mahse, 3-2 in an chak ta tho.

Valpuia chuan, "Club-in player inhliam kan ngah lutuk a, hei vang hian club lamin risk an la ngam lo a ni ber," a ti a, SAFF-ah India chuan final lut pawh ni se, an khelh tawh loh tur thu Vanglaini a hrilh.

India hian November 11, Nilaini tlai dar 3:00-ah Maldives nen match an khel leh dawn a, draw chauh pawhin semifinal an lut tawh ang - hetihrual hian player koh zingah squad zawm lo an awm sa bawk nen, an buai viau mai thei!

SAFF squad-a player awm sa, Bijoy Varghese, Muhammad Suhail, Tomba Singh leh Liston Colaco te chuan New Zealand-a tour nei tur, India squad pakhat zawk an zawm bawk a, FC Goa centre back Ronney Kharbudon leh Bengaluru midfielder Suresh Singh ten hliam vangin squad an zawm lo bawk.

Mumbai player kirte hi Valpuia bakah Farukh Choudhary leh Noufal PN te an ni a, SAFF-a India coach Naushad Moosa tan buai a zual viau ang tih a chiang!