Palace-in Sage ban an tum

Liverpool laka chak lo hlim Crystal Palace chuan an manager Pierre Sage chu ban an tum a, he thuziak i chhiar meuh chuan an inban tawh hial mai thei - thla nga chiah London club hi a la enkawl hman!

Reds laka 3-1 a tlawm Palace-in Liverpool an ngam loh chiah khan league match li a zawna an tlawmna chiah a ni a, match 10 an khelh tawhah vawi hnih chiah hnehna an la chang ve - he thu buatsaih a nih lai hian club thuneitu lam an inrawn mek.

Palace thuneitute chuan Tottenham Hotspur leh Brentford manager hlui Thomas Frank chu Sage thlak tur hian an duh nia sawi a ni a, EPL club tenau lama tawnhriat nei ṭha tak, Nottingham Forest boss hlui Sean Dyche-a hming pawh lam rik a ni bawk.

Coach pahnih hi hna nei loin an awm mek ve ve a, Palace hian international break-a team enkawl nghal thei tur an duh nia sawi a ni. London club hian tun season-ah league match 10 aṭangin point sarih chiah an la hlawh chhuak a, goal 24 ngawt chhuah tawhin, anni aia chhuah hnem an awm rih lo.

Europa League lamah pawh match li an khelh aṭanga vawi khat chiah la chakin, table-ah 21-na an ni mek bawk a, season hmasaa Oliver Glasner hoa Europa Conference League champion an nih laite chu thawnthu an chang ṭan der!

French coach Sage hian June thla khan kum thum chhung atan Palace hi a zawm a, ban a nih chuan tun season EPL-a coach ban hmasak ber a ni ang.