Sunderland lakah Chelsea an tlawm!
Xabi Alonso-a Chelsea pawh an la fuh hleithei lo - Pathianni zan khan tlak hlauhthawnawma ding Sunderland chu 1-0 in an ngam lo a, London club hi an chak thu kan ziah hnu lawkah an chak loh thu ziah a ngai leh ṭhin!
Sunderland tan Enzo Le Fee chuan penalty aṭangin inkhela goal awmchhun a khung a, Joao Pedro tel loa inlan Blues-in Black Cats tan harsatna liantham an thlen thei lo - khualmualah 1-0 in an tlawm a, panganaah an tla leh ta.
Black Cats tan August hnua Premier League-a an chak leh hmasak ber a ni a, relegation zone aṭangin la tal chhuak nghal mai lo mah se, Chelsea an hneh miau avangin manager Regis le Bris dinhmun pawh a him leh sawt.
Sawisel hlawh
Sunderland-in minute 36-naah inkhela goal awmchhun an khung a, an goal khung hi penalty aṭanga chhuih luh a ni - Chelsea defender Levi Colwill leh Brian Brobbey ten ball an inchuh a, Colwill tan Dutch striker a chak mah mah.
Player pahnih innek tawn karah, penalty area-ah thiam takin Brobbey a tlu a, referee Jarred Gillett-a'n penalty box a kawk zui - Chelsea tan referee thutlukna a na ang tih a chiang a, mahse, tih theih dang an nei chuang lo.
Black Cats tan Le Fee-a'n cool takin an chance neih hi goal-ah a chantir zui a, hun tawp thlengin Chelsea hian a chhanletna tur an nei tawh lo a, an tlawm.
A na asin
Sunderland penalty hlawhchhuah danin sawisel a hlawh a, Chelsea hi Sunderland-in penalty an hlawhchhuah hma hian an penalty beisei pek an ni lo thung - Luke O'Nien chuan Palmer a titlu a, English midfielder hi penalty box-ah a tlu.
Referee-in foul-ah a ngai lo zet a, mahse, Video Assistant Referee a inrawlh. Thil thlen dan thlir nawn a ni a, referee-in foul a awm ti mah se, penalty erawh a pe lo - O'Nien khan Palmer a titlu ngei a, mahse, box pawnah a tawk fuh phawt, tih chu referee thutlukna a ni.
Chelsea tan pai dam a harsa ang tih a chiang a, an thinlung natna belhchhah turin penalty an chawi zui bawk - a tawpah Sunderland chak nan a tawk a, an hneh ngei tura ngaih team lakah Chelsea an tlawm.
Chhuanlam a awm lo!
Chelsea-in relegation zone-a awm team lakah hnehna an chang lo a, match official-te inkhel enkawl danah lungawi lohna tur a awm bawk. Mahse, Xabi Alonso-a'n chhuanlam a zawng duh lo a, an tih tur an tih tawk loh thu a sawi.
Spanish coach chuan Sunderland striker Brobbey chu hnawksak a tih leh tih loh chungchanga zawhna chhangin, "Dan theih a ni a, a harsa lo. Mahse, kan ti ṭha tlat lo alawm! Engmah lo aṭangin chance a nei fo a, penalty pawh a hlawh chhuak mawle!
"Tlarhnung kan ven danah ka lawm lo a, penalty kha chawi lo thei kan ni a, khangte chu kar tluanin kan zir! Khatianga penalty chawi kha chu a ṭha lo a ni," a ti a, a naute khelh dana a lawm loh thu a sawi.