E4 Chess Tournament hlawhtling

Mizoram Chess Association (MCA) leh Pu Lalchhuana Chess Academy (PLCA), Thingsul Tlangnuam buatsaih Second E4 Chess tournament 2026 chu hlawhtling taka neih a ni - he inelnaah hian school hrang hrang aṭangin player 251 laiin inelna an hmachhawn thei a ni.

Ramhlun Indoor Stadium, Aizawl-a neih naupang pual inelna hi one day tournament niin, age category panga - Under-17, U15, U13, U11 leh U9-ah te an inel.

Inelnaah hian FIDE (World Chess Federation) dan thar ber hman a ni a, ‘Swiss System’ hmanga khelh niin, time control-ah 30 mins + 10 Sec increment hman a ni a, round nga khelh a ni.

Mt Horeb School, Mualpui chu school anga player thawh hnem ber niin, an school naupang 33 ngawtin inelna an hmachhawn a, Neuhof English Medium School chuan player 29 tel tirin, tel tam ber dawttu an ni a, St Mary’s School aṭangin player 24 an tel bawk.

Mizorama chess infiamnain hma a sawn theihna tura buatsaih tournament-ah hian MCA general secretary H. Lalthlamuana chu Tournament Director niin, Chief Arbiter-ah R. Lalawmpuia, Senior National Arbiter a ni bawk.