Atletico hnehtu Barca-in hmahruai chhunzawm
Spanish champion Barcelona chuan Pathianni zan khan an mikhualna ramah 2-1 in Atletico Madrid an hneh a, table-ah hmahruai chhunzawm zelin an champion nomawi thlauh thlak an tum lo hle.
Atletico tan Giuliano Simeone chuan goal hmahruai a khung a, mahse Barca tan Fermin Lopez chuan goal hnihin a chhang let a, Barca chak nan a tawk.
Inkhel chu
Riyadh Air Metropolitano-a inkhelah team pahnihte an inhlau lo tawn a, chance nei hmasa zawk erawh mual neitu an ni. Marc Pubill chuan corner aṭangin goal bar a tauh per nghal.
Barca-in Atletico rum ṭhaih ve nghalin Pedri leh Yamal ten ball an inpek kual hnuah, Spanish midfielder-in goal kham a pet per a, boruak a nung ṭha nghal.
Minute 10-na lekah goal a lut ta nge nge a, Atletico-in mawi taka Barca tlarhnung an ṭhiah hnuah Julian Alvarez-a cross chu, Simeone-a'n hnai tak aṭangin an hmahruaina atan a khung. Argentine forward hi Barca defender ten an veng ṭha tawk lo hle.
Goal an chhuah hnuah pawh Barca an la insiamṭha thei meuh lo a, Atletico tan Kang-in Lee leh Alvarez ten chance an neih chhunzawm a, goal an chhuah belh lo chu an vannei hle.
Catalan club tan Lamine Yamal a hmuhnawm a, mahse Spanish rawlthar hian a hmawr a bawk fuh thei lo a, a hun ṭha neih vawi hnih a bawhpelh. Mahse Barca tan Lopez a inlar a, first half tawp hma hretin an siphurh sutna goal ṭha tak a khung a, 1-1 in chawlhlawk an hmang.
Barca nge nge
Second half-ah erawh Barca-in inkhel an thunun tawh a, goal erawh an khung thei lawk chuang lo. Yamal-a'n a chance neih a hlah leh a, a vanneih zan ni lo mah se assist a nei ta tho.
Kum 19 mi Yamal-a ball pek ṭha tak chu a hnampui Lopez-a'n um lutin, tawih takin a khung a, goal chhuah hmasa zawk Barca-in hma an hruai. Hma an hruai hnuah Barca an inthlahdah tawh lo a, a chungnung zawkah an ṭang tluan.
Atletico erawh a buai zawkah an ṭang chhunzawm a, Alvarez-a'n chance nei lehin Barca keeper Joan Garcia pet khum mah se goal kham chungah a kal. Hun tawp thlenga an siphurh an sut theih loh avangin Barca-in hnehna an chang.
Engtin zel?
Hansi Flick-a naute hian table-ah point 33 hmuin hma an hruai chhunzawm a, anmahni hnaih bertu an hmelma Real Madrid aiin point thumin an sang zawk. Chutihrualin international break zawhah fiahna an hmachhawn dawn a, Manchester City an hmachhawn hnu lawkah Atletico nen an intawng leh dawn.
Hetihlai hian Atletico erawh point an ṭhenawm club Real-in an lehpel tawh a, point hnihin an inthlau mek, Los Blancos an harh thar avangin La Liga table chunglam inum a ngaihnawm dawn chauh.