Inter-in Lazio um zel

Inrinni zan Serie A inkhelah Inter Milan chuan 2-0 in Como an hneh a, Inter hian Cesc Fabregas-a naute chak kaltluang lai an tihtawpsak bakah hmahruaitu Lazio nen an inthlauhna an tizim.

San Siro-a inkhelah mual neituin goal an khung hma a, minute 12-na lekah Djed Spence-a cross chu Pio Esposito-a'n hnai tak aṭangin a khung a, a team hma a hruaipui nghal.

Inter an phur laklawh a, minute sarih hnu lawkah goal an khung leh nghal. Piotr Zielinski cross chu Como defender ten lo dang per mah se, Marcus Thuram-a'n kawh zetin a khung leh nghal a, an hmahruaina a belhchhah.

Goal hnih an khung hnuah pawh Inter an hlauhawm a, Federico Dimarco chuan a hun ṭha neih vawi hnih a hlah a, Thuram-a'n goal dang khung theihna chance nei mah se a chhawr ṭangkai thei lo bawk.

Como tan an thiampuipa Nico Paz a langsar a, mahse Argentine midfielder hian chance vawi hnih nei mah se Inter keeper Josep Martínez tan hna hautak a siamsak thei lo a, hun tawp thlenga goal an khung ve theih loh avangin a tlawm zawkah an ṭang.

Inter hian point 28 hmuin pahnihnaah an awm a, Pathianni zan vek khan chak loh la nei lo Lazio chu Napoli-in 1-1 in an chelh a, Inter-in point khat chiahin Lazio an pha lo.